Twitter គ្រោងប្តឹងមហាសេដ្ឋី Elon Musk ពាក់ព័ន្ធកិច្ចព្រមព្រៀងតម្លៃ៤៤ពាន់លានដុល្លារ
អាមេរិក ៖ ក្រុមហ៊ុន Twitter បានឆ្លើយតបត្រឡប់ទៅកាន់លោក Elon Musk វិញកាលពីថ្ងៃចន្ទ ទី ១១ ខែកក្កដា ម្សិលមិញនេះ ដោយចោទប្រកាន់មហាសេដ្ឋីលេខ ១ពិភពលោករូបនេះថាបានរំលោ.ភកិច្ចព្រមព្រៀងទិញដោយចេតនា។
ការចោទប្រកាន់របស់ Twitter កើតឡើងតែប៉ុន្មានថ្ងៃប៉ុណ្ណោះបន្ទាប់ពីលោក Elon Musk បានប្រកាសលុបចោលកិច្ចព្រមព្រៀងទិញបណ្តាញសង្គមនេះក្នុងតម្លៃ ៤៤ពាន់លានដុល្លារ ដោយលោកថា ក្រុមហ៊ុនបានរំលោ.ភបទប្បញ្ញត្តិជាច្រើននៃកិច្ចព្រមព្រៀងបញ្ជូលគ្នា។
នៅក្នុងលិខិតទៅកាន់លោក Elon Musk កាលពីថ្ងៃអាទិត្យ និងបានដាក់ទៅកាន់និយតករកាលពីថ្ងៃចន្ទម្សិលមិញ Twitter និយាយថា ខ្លួនមិនបានបំពានកាតព្វកិច្ចរបស់ខ្លួនក្រោមកិច្ចព្រមព្រៀងបញ្ជូលគ្នានោះទេ។
ក្រុមហ៊ុនគ្រោងប្តឹងលោក Elon Musk ដើម្បីបង្ខំគាត់ឲ្យបញ្ចប់កិច្ចព្រមព្រៀងទិញ ប៉ុន្តែការគំរា.មប្តឹងនោះត្រូវបានលោកសើចចំអកកាលពីថ្ងៃចន្ទម្សិលមិញ។
Twitter គ្រោងដាក់ពាក្យបណ្តឹងនៅដើមសប្តាហ៍នេះនៅក្នុងរដ្ឋ Delaware។ នេះបើយោងតាមមនុស្សមួយចំនួនដែលបានដឹងពីបញ្ហានេះប្រាប់ទីភ្នាក់ងារសារព័ត៌មាន Reuters។
បណ្តាញសង្គមយក្សនេះក៏និយាយផងដែរថា កិច្ចព្រមព្រៀងបញ្ជូលគ្នានៅតែមានដដែល ហើយខ្លួននឹងចាត់វិធានការដើម្បីបិទបញ្ចប់កិច្ចព្រមព្រៀងនោះ៕ (យោងតាមប្រភព៖ Reuters)
