ពានយុវជន U15 និង U18 នឹងធ្វើការប្រកួតវគ្គផ្ដាច់ព្រ័ត្រនាចុងសប្ដាហ៍នេះ!
ការប្រកួតបាល់ទាត់ជម្រើសជើងឯកយុវជនអាយុក្រោម ១៥ឆ្នាំ និងអាយុក្រោម ១៨ឆ្នាំរដូវកាលឆ្នាំ២០២២ បានរកឃើញក្រុមឡើងវគ្គផ្ដាច់ព្រ័ត្រហើយ ដែលនឹងត្រូវប្រកួតកាត់សេចក្ដីរកក្រុមជើងឯកនាចុងសប្ដាហ៍នេះហើយ។
សម្រាប់ពានយុវជន U15 គឺក្រុមយុវជនសាលាតម្រង់ទិសខេត្តស្វាយរៀង និងក្រុមយុវជនក្លិបកងធពលខេមរភូមិន្ទ បានឡើងវគ្គផ្ដាច់ព្រ័ត្រ បន្ទាប់ពីយកឈ្នះគូប្រកួតរៀងៗខ្លួនក្នុងវគ្គពាក់កណ្ដាលផ្ដាច់ព្រ័ត្រ កាលពីចុងសប្ដាហ៍កន្លងទៅ ក្នុងនោះក្រុមសាលាតម្រង់ទិសខេត្តស្វាយរៀង បានយកឈ្នះក្រុមអង្គរថាយហ្គឺរដោយការទាត់បាល់ប៉េណាល់ទី ៧-៦ ក្រោយប្រកួតពេញម៉ោងស្មើរគ្នា ០-០ ។ រីឯក្រុមយុវជនកងយោធពលខេមរភូមិន្ទបានយកឈ្នះក្រុមណាហ្គាវើលដ៏-កំពង់ស្ពឺដោយលទ្ធផល ២-០។
ចំណែកឯពានយុវជន U18 វិញ ក្រុមយុវជនភ្នំពេញក្រោនបានយកឈ្នះក្រុមសាលាបាល់ទាត់ជាតិបាទី ៤-០ ខណៈក្រុមវិសាខាបានយកឈ្នះក្រុមសាលាតម្រង់ទិសខេត្តបន្ទាយមានជ័យ ៤-០ ដូចគ្នាក្នុងវគ្គពាក់កណ្ដាលផ្ដាច់ព្រ័ត្រ ដែលនាំឲ្យក្រុមទាំងពីរដឹកដៃគ្នាឡើងវគ្គផ្ដាច់ព្រ័ត្រ។ ចំពោះការប្រកួតវគ្គផ្ដាច់ព្រ័ត្រនឹងត្រូវធ្វើឡើងនៅទឹកដីកណ្ដាល ដោយគណៈកម្មការរៀបចំការប្រកួតនឹងរៀបចំនៅមជ្ឈមណ្ឌលសាលាបាល់ទាត់ជាតិបាទីនាថ្ងៃទី០៤ ខែកញ្ញាចុងសប្ដាហ៍នេះ៕
