Down Town Sport ចេញទៅប្រទេសថៃ ថ្ងៃស្អែកនេះ ត្រៀមប្រកួតពានរង្វាន់ AFF Futsal Club 2022!

ការចាប់ឆ្នោតការប្រកួតក្នុងការប្រកួតពានរង្វាន់ Aff Futsal Club 2022 ដែលប្រទេសថៃទទួលធ្វើជាម្ចាស់ផ្ទះ រួចរាល់ផងដែរ ក្នុងនោះក្រុម Down Town Sport ដែលបានប្ដូរឈ្មោះពីក្រុម The Blue Warriros FC  ដែលជាជើងឯកពានរង្វាន់បាល់ទាត់ក្នុងសាលថ្នាក់ជាតិឆ្នាំ២០២១ ទទួលបានសិទ្ធទៅលេងក្របខណ្ឌអាស៊ានឆ្នាំ២០២២តំណាងអោយ កម្ពុជាស្ថិតក្នុងពូល A ។
ក្រុមជើងឯកមកពីបណ្តាប្រទេសទាំង៧ ក្នុងតំបន់អាស៊ានត្រូវបែងចែកជា ២ពូល ដោយពូល A មាន៤ក្រុម ក្រុម Hongyen Thakam (ថៃ), ក្រុម Down Town Sport (កម្ពុជា), ក្រុម Bintang Timur (ឥណ្ឌូនេស៊ី) និង ក្រុម Perwira (ប្រ៊ុយណេ) ដោយឡែកសម្រាប់ពូលB ក្រុម Selangor MAC (ម៉ាឡេស៊ី), ក្រុម Sahako (វៀតណាម) និង ក្រុម Ramelau (ទីម័រ) ។
សម្រាប់កាលកាលបរិច្ឆេទប្រកួតពានរង្វាន់ក្លិបបាល់ទាត់ក្នុងសាលក្របខណ្ឌអាស៊ានឆ្នាំ២០២២នឹងប្រព្រឹត្តទៅពីថ្ងៃទី០៤ ដល់ថ្ងៃទី១០ ខែកញ្ញា ឆ្នាំ២០២២ ដោយប្រកួតទីមួយរបស់ Down Town Sport (កម្ពុជា), ប្រកួតជាមួយក្រុម Bintang Timur Surabaya (ឥណ្ឌូនេស៊ី) នៅថ្ងៃទី ០៤ ខែ កញ្ញា ឆ្នាំ២០២២ ម៉ោង០២:៣០ រសៀល ហើយបន្តទៅជួបក្រុម Perwira (ប្រ៊ុយណេ) នៅថ្ងៃទី ០៥ ខែ កញ្ញា ឆ្នាំ២០២២ ម៉ោង០២:៣០ រសៀល និងប្រកួតចុងក្រោយជួបជាមួយក្រុមម្ចាស់ផ្ទះថៃគឺក្រុម Hongyen Thakam នៅថ្ងៃទី ០៦ ខែ កញ្ញា ឆ្នាំ២០២២ ម៉ោង០៥:០០ រសៀល ៕