ពានរង្វាន់បាល់ទាត់ជម្រើសជើងឯកយុវជនU15 និង U18 រកឃើញជាម្ចាស់ជើងឯក!

ការប្រកួតបាល់ទាត់ជម្រើសជើងឯកយុវជនអាយុក្រោម ១៥ឆ្នាំ និងអាយុក្រោម ១៨ឆ្នាំរដូវកាលឆ្នាំ២០២២ បានរកឃើញម្ចាស់ជើងឯកហើយកាលពីម្សិលមិញដោយ ក្រុមវិសាខា ក្លាយជាម្ចាស់ជើងឯក U18 ខណ: Tiffy Army គ្រងជើងឯក U15 ។
សម្រាប់ពានយុវជន U15 គឺក្រុមបាល់ទាត់យុវជនក្រោមអាយុ១៥ឆ្នាំ Tiffy Army FC គ្រងជើងឯកយុវជនថ្នាក់ជាតិឆ្នាំ២០២២ ក្រោយយកឈ្នះក្រុមខេត្តស្វាយរៀង ដោយបាល់កាត់សេចក្តី១១ម៉ែត្រ ៤-២ បន្ទាប់ពីស្មើគ្នា នៅម៉ោងធម្មតា៩០នាទី ១-១ នៅមជ្ឈមណ្ឌលសាលាបាល់ទាត់ជាតិបាទី និងក្រុមចំណាត់ថ្នាក់លេខ៣ បានទៅលើអង្គរថាយហ្គឺរក្រោយយកឈ្នះណាហ្គាវើលដ៍កំពង់ស្ពឺ ។
ខណៈក្រុមបាល់ទាត់យុវជនក្រោមអាយុ១៨ឆ្នាំ វិសាខា គ្រងជើងឯកយុវជនថ្នាក់ជាតិឆ្នាំ២០២២ ក្រោយយកឈ្នះក្រុមភ្នំពេញក្រោន វគ្គផ្តាច់ព្រ័ត្រ ៣-១ រសៀលថ្ងៃអាទិត្យ ទី៤ ខែកញ្ញា នៅទីលានមជ្ឈមណ្ឌល សាលាបាល់ទាត់ជាតិបាទី ចំណែកក្រុមចំណាត់ថ្នាក់លេខ៣បានទៅលើ ក្រុមសាលាបាល់ទាត់ជាតិបាទី ក្រោយឈ្នះសាលាតម្រង់ទិសខេត្តបន្ទាយមានជ័យ ៕