គ្រូ Bayern ថាកូនក្រុមខ្លួនសុទ្ធតែចង់រក្សាជ័យជម្នះលើ Barcelona ទៀត!
លោក Julian Nagelsmann គ្រូបង្វឹករបស់ក្រុម Bayern Munich បានអះអាងថាសមាជិករបស់លោកទាំងអស់សុទ្ធតែតាំងចិត្តយកឈ្នះលើក្រុម Barcelona នៅយប់ស្អែកនេះក្នុងពានរង្វាន់ UEFA Champions League ។
ក្រុម Bayern នឹងបើកទ្វារផ្ទះទទួលក្រុមអ្នកមានបុណ្យ Barcelona នៅរាត្រីនេះក្នុងការប្រកួតវគ្គសន្សំពិន្ទុពូល C នៃពានរង្វាន់ Champions League។ ជំនួបសប្ដាហ៍ទី២នៅក្របខណ្ឌ UEFA Champions League នេះដែរ គឺពិតជាសំខាន់សម្រាប់ក្រុមទាំង២ អាចថាជាការប្រកួតសងសិកក៏ថាបានដែរ ដោយ ចំពោះស្ថិតិប្រកួតកន្លងទៅ Bayern ធ្លាប់បានឈ្នះនៅ៤ប្រកួតចុងក្រោយពេលប៉ះ Barca ក្នុងនោះពួកគេបានឈ្នះ ៣-០ ក្នុងវគ្គសន្សំពិន្ទុកាលពីរដូវកាលមុន និងឈ្នះ ៨-២ ក្នុងវគ្គ៨ក្រុមចុងក្រោយកាលពីឆ្នាំ២០២០ ។
បើតាមការបញ្ជាក់របស់លោក Julian Nagelsmann ក្រុម Bayern ផ្ដោតលើការប្រកួត Champions League ខ្លាំង។ បើទោះជាលេងនៅលីគមិនសូវល្អក្ដី ប៉ុន្តែសម្រាប់ពាន Champions League សមាជិកក្រុមទាំងអស់សុទ្ធតែជឿជាក់និងត្រៀមខ្លួនជានិច្ចសម្រាប់ចូលប្រកួត និងយក៣ពិន្ទុក្នុងទឹកដីឱ្យបាន ៕
