Bayern បញ្ចប់កំណត់ត្រាលោក Xavi ដឹកនាំក្រៅដីមិនចាញ់១៧ប្រកួតជាប់ៗគ្នា!

ក្លិបបាល់ទាត់ Bayern Munich របស់ប្រទេសអាល្លឺម៉ង់ ក្រោមការដឹកនាំរបស់លោក Julian Nagelsmann បានយកឈ្នះអ្នកមានបុណ្យ Barcelona ក្នុងលទ្ធផល ២-០ នៅកីឡដ្ឋាន Allianz Arena វគ្គជម្រុះពូល C ពានរង្វាន់ជើងឯកទ្វីបអឺរ៉ុប UEFA Champions League 2022–23 ។
Bayern Munich រកបាន២គ្រាប់លើ Barca គឺកើតឡើងទៅតង់ទី២ ដោយប្រើពេលត្រឹមតែ៤នាទីប៉ុណ្ណោះ ពោលគឺខ្សែការពារ Lucas Hernandez ធ្វើបាននៅនាទី៥០’ និងខ្សែប្រយុទ្ធស្លាប Leroy Sane នៅនាទី៥៤’។
ក្នុងនោះក្លិប Bayern Munich ក៏បានបញ្ចប់កំណត់ត្រាប្រកួតក្រៅដី១៧ប្រកួតជាប់ៗគ្នាមិនចាញ់សោះរបស់លោក Xavi គ្រូបង្វឹកក្លិបអ្នកមានបុណ្យ FC Barcelona ផងដែរ។
ខណ:ក្លិប Bayern Munich គិតចាប់តាំងពីឆ្នាំ២០១៧ មិនទាន់ស្គាល់ពាក្យថាបរាជ័យម្តងណាឡើយ ពីការប្រកួតចំនួន៣០លើកចុងក្រោយ ក្នុងវគ្គសន្សំពិន្ទុក្នុងពូល នៃក្របខណ្ឌ UEFA Champion League ។
គិតត្រឹម២ប្រកួតក្នុងពូលC៖ ក្រុម Bayern Munich ឈរកំពូលតារាងមាន មាន៦ពិន្ទុ លេខ២ Barcelona មាន៣ពិន្ទុ លេខ៣ Inter Milan មាន៣ពិន្ទុ និងបាតតារាង ក្រុមViktoria Plzen មានសូន្យពិន្ទុ ៕