Real Madrid ប្រជែងយកខ្សែបម្រើ Jude Bellingham!

ក្រុមអធិរាជស Real Madrid បានចូលខ្លួនប្រជែងជាមួយក្រុម Manchester City ហើយ ដើម្បីដេញថ្លៃទិញយកខ្សែបម្រើ Jude Bellingham ពីក្រុម Dortmund នៅរដូវកាលក្រោយ។

កីឡាករវ័យ១៩ឆ្នាំខាងលើបានចាត់ចូលជាខ្សែបម្រើឆ្នើមម្នាក់នៅអឺរ៉ុបនាពេលបច្ចុប្បន្ននេះ ដោយបង្ហាញខ្លួនបាន១០០ប្រកួតឱ្យក្រុម Dortmund និងបង្ហាញខ្លួននៅជម្រើសជាតិអង់គ្លេសបាន១៦ប្រកួតផងដែរ។ ដោយបានមើលឃើញពីការអភិវឌ្ឍខ្លួនយ៉ាងលឿនរបស់គេ មានក្លិបនៅអឺរ៉ុបជាច្រើនជាពិសេសនៅអង់គ្លេសតែម្ដង បានទាក់ទងទិញ ព្រោះគេជាកីឡាករអង់គ្លេសស្រាប់។ ដោយក្នុងនោះ Manchester City បានបង្ហាញការចង់បានខ្លាំងជាងគេ។

តែស្របពេលជាមួយគ្នានេះដែរ ខាងក្រុមអេស្ប៉ាញ Real Madrid ក៏សម្លឹងឃើញដូចគ្នា។ ក្រុមរបស់លោក Carlo Ancelotti ចង់បានកីឡាករវ័យក្មេងខាងលើ ដើម្បីទៅអមជាមួយកីឡាករវ័យក្មេងមានសមត្ថភាពដែលពួកគេនាំចូលមកស្រាប់ដូចជា Aurelien Tchouameni និង Eduardo Camavinga ជាដើម។ ប្រសិនបើអាចធ្វើបានសម្រេចមែន នោះក្រុម Real Madrid នឹងមានកីឡាករឆ្នើមៗនៅតំបន់បម្រើ ដើម្បីទុកលេងបានយូរឆ្នាំទៀតមិនខាន ៕