អូស្ត្រាលីនឹងទិញនាវាមុជទឹកនុយក្លេអ៊ែរ ចំនួន ៥ គ្រឿង ពីសហរដ្ឋអាមេរិក
អូស្ត្រាលីត្រូវបានគេរំពឹងថានឹងទិញនាវាមុជទឹកដើរដោយថាមពលនុយក្លេអ៊ែរថ្នាក់រដ្ឋ Virginia ចំនួន ៥ គ្រឿងរបស់សហរដ្ឋអាមេរិកនៅក្នុងទសវត្សរ៍ឆ្នាំ ២០៣០ ដែលជាផ្នែកនៃកិច្ចព្រមព្រៀង សន្តិសុខប៉ាស៊ីហ្វិកដ៏សំខាន់ជាមួយសហរដ្ឋអាមេរិក និងចក្រភពអង់គ្លេស នេះបើយោងតាមការចេញផ្សាយរបស់ Ajazeera នៅថ្ងៃទី០៩ ខែមីនា ឆ្នាំ២០២៣ នេះ។
ទីភ្នាក់ងារសារព័ត៌មានរ៉យទ័របានឲ្យដឹងថា ក្រោមកិច្ចព្រមព្រៀង AUKUS យ៉ាងហោចណាស់នាវាមុជទឹកអាមេរិកមួយ នឹងធ្វើទស្សនកិច្ចនៅកំពង់ផែអូស្ត្រាលីក្នុងប៉ុន្មានឆ្នាំខាងមុខ ហើយនៅចុងទសវត្សរ៍ឆ្នាំ ២០៣០នាវាមុជទឹកប្រភេទថ្មី នឹងត្រូវបានសាងសង់ឡើងជាមួយនឹងការរចនារបស់ចក្រភពអង់គ្លេស និង បច្ចេកវិទ្យារបស់សហរដ្ឋអាមេរិក។
ជាមួយគ្នានេះដែរនាយករដ្ឋមន្ត្រីអូស្ត្រាលីលោក Anthony Albanese គ្រោងនឹងជួបជាមួយប្រធានាធិបតីអាមេរិក Joe Biden និងនាយករដ្ឋមន្ត្រីអង់គ្លេស Rishi Sunak នៅ San Diego ឆាប់ៗនេះ ដើម្បីបង្ហាញពីជំហានបន្ទាប់របស់ AUKUS ។ កតិកាសញ្ញាសន្តិសុខ ប៉ាស៊ីហ្វិក ដែលបានប្រកាសជាលើកដំបូងនៅក្នុងខែកញ្ញា ឆ្នាំ ២០២១ ត្រូវបានគេមើលឃើញថាជាការប៉ុនប៉ង ដើម្បីប្រឆាំងនឹងការកើនឡើងនៃកម្លាំង និងជំហររឹងមាំរបស់ចិននៅក្នុងតំបន់ ហើយបានទាញការថ្កោលទោសពីទីក្រុងប៉េកាំង។
មន្ត្រីពីររូបដែលនិយាយក្នុងលក្ខខណ្ឌមិនបញ្ចេញឈ្មោះបាននិយាយថា បន្ទាប់ពីដំណើរទស្សនកិច្ចកំពង់ផែប្រចាំឆ្នាំ សហរដ្ឋអាមេរិក នឹងដាក់ពង្រាយនាវាមុជទឹកមួយចំនួននៅតំបន់ភាគខាងលិចអូស្ត្រាលី នៅប្រហែលឆ្នាំ ២០២៧។
គួរឲ្យដឹងផងដែរថា អូស្ត្រាលីមានកងនាវាដែលមានស្រាប់នៃនាវាមុជទឹក Collins-class ដើរដោយថាមពលធម្មតាចំនួនប្រាំមួយ ដែលនឹងមានរយៈពេលសេវាកម្មរហូតដល់ឆ្នាំ ២០៣៦។ នាវាមុជទឹកនុយក្លេអ៊ែរអាចស្នាក់នៅក្រោមទឹកបានយូរជាងនាវាធម្មតា ហើយពិបាករកឃើញ។
កាសែត Guardian របស់ចក្រភពអង់គ្លេសបានរាយការណ៍កាលពីថ្ងៃពុធដោយដកស្រង់ប្រភពជាច្រើនដែលមិនបញ្ចេញឈ្មោះថាចក្រភពអង់គ្លេសបាន “ជោគជ័យក្នុងការដេញថ្លៃរបស់ខ្លួនដើម្បី លក់នាវាមុជទឹកនុយក្លេអ៊ែរដែលរចនាដោយអង់គ្លេសទៅឱ្យអូស្ត្រាលី” ។
គួរបញ្ជាក់ថា នៅក្រោមកិច្ចព្រមព្រៀងដំបូងរបស់ AUKUS សហរដ្ឋអាមេរិក និងចក្រភពអង់គ្លេសបានព្រមព្រៀងគ្នាក្នុងការផ្តល់ឱ្យអូស្ត្រាលីនូវបច្ចេកវិទ្យា និងសមត្ថភាពក្នុងការដាក់ពង្រាយ នាវាមុជទឹកដើរដោយថាមពលនុយក្លេអ៊ែរ៕
