លោក Zelensky និយាយថា ស្ថានភាពនៅ Bakhmut កាន់តែអាក្រក់ទៅៗ

ប្រធានាធិបតីអ៊ុយក្រែន លោក Volodymyr Zelensky បាននិយាយថា ស្ថានភាពនៅទីក្រុង Bakhmut ស្ថិតនៅជួរមុខភាគខាងកើត កាន់តែមានភាពលំបាក ព្រោះកងកម្លាំងរុស្ស៊ីបានព្យាយាមដណ្តើមយកទីក្រុងនេះ អស់រយៈពេលជាងប្រាំមួយខែមកហើយ។

ការកត់សម្គាល់របស់មេដឹកនាំអ៊ុយក្រែនបានធ្វើឡើងនៅពេលដែលរដ្ឋមន្ត្រីក្រសួងរតនាគារសហរដ្ឋអាមេរិក Janet Yellen បានព្រមានប្រទេសចិនប្រឆាំងនឹងការបំពាក់អាវុធដល់ប្រទេសរុស្ស៊ី ក្នុងអំឡុងពេលដំណើរទស្សនកិច្ច ទៅកាន់ទីក្រុង Kyiv កាលពីថ្ងៃចន្ទ។

ការប្រយុទ្ធគ្នាយ៉ាងខ្លាំងក្លាបំផុតដែលបានកើតឡើងចាប់តាំងពីរុស្ស៊ីបានឈ្លានពានអ៊ុយក្រែនកាលពីជាងមួយឆ្នាំមុន បានកើតឡើងនៅ Bakhmut ក្នុងតំបន់ Donetsk របស់អ៊ុយក្រែន ដែលផ្នែកមួយស្ថិតនៅក្រោមការ គ្រប់គ្រងរបស់រុស្ស៊ី និងសម្ព័ន្ធមិត្តផ្តាច់ខ្លួនរបស់ខ្លួន។

នាពេលថ្មីៗនេះ កិច្ចខិតខំប្រឹងប្រែងរបស់កងកម្លាំងរុស្ស៊ី ដើម្បីដណ្តើមយកទីក្រុងឧស្សាហកម្មនេះ កាន់តែខ្លាំងឡើង ដោយបញ្ជូនកងទ័ពរបស់ខ្លួនបានដណ្តើមយកទីក្រុងនេះកាន់តែច្រើនឡើង។

មេដឹកនាំផ្តាច់ខ្លួននៃសាធារណរដ្ឋប្រជាមានិត Donetsk ដែលប្រកាសដោយខ្លួនឯងគឺលោក Denis Pushilin បាននិយាយថា “ផ្លូវទាំងអស់ដែលចូលទៅក្នុងទីក្រុង គឺស្ថិតនៅក្រោមការគ្រប់គ្រងរបស់រុស្ស៊ី”។

មេបញ្ជាការកងទ័ពជើងគោកអ៊ុយក្រែន លោក Col Gen Oleksandr Syrskyi បាននិយាយថា ស្ថានភាពនៅជុំវិញ Bakhmut មានភាពតានតឹងខ្លាំង ដោយសត្រូវកំពុងព្យាយាមទម្លុះការការពាររបស់ កងទ័ពរបស់យើង ហើយឡោមព័ទ្ធទីក្រុង៕