WHO ប្រកាសអាសន្នកម្រិតខ្ពស់បំផុតនៃការរាតត្បាតជំងឺអ៊ុតស្វា
ស្វីស ៖ អង្គការសុខភាពពិភពលោក (WHO) បានប្រកាសអាសន្នកម្រិតខ្ពស់បំផុត ពាក់ព័ន្ធនឹងការរាតត្បាតនៃជំងឺអ៊ុតស្វា (Monkeypox)។ នេះបើយោងតាមប្រភពពី BBC ចេញផ្សាយកាលពីថ្ងៃទី២៣ ខែកក្កដា ឆ្នាំ២០២២។
ការចាត់ថ្នាក់នេះ បានកើតឡើងនៅការបញ្ចប់នៃកិច្ចប្រជុំលើកទី២ គណៈកម្មាធិការសង្គ្រោះបន្ទាន់របស់ WHO ស្តីពីមេរោគ។ ហើយក៏ជាការជូនដំណឹងកម្រិតខ្ពស់បំផុត ដែល WHO ត្រូវប្រកាស និងអនុវត្តតាម ផ្អែកលើការកើនឡើងករណីឆ្លងជំងឺអ៊ុតស្វា នៅទូទាំងពិភពលោក។
លោកវេជ្ជបណ្ឌិត Tedros Adhanom Ghebreyesus ដែលជាប្រធាន WHO បាននិយាយថាជាង១៦,០០០ករណីឆ្លង ត្រូវបានរាយការណ៍ពីប្រទេសចំនួន៧៥។ រហូតមកដល់ពេលនេះ មានអ្នកស្លា.ប់ចំនួន៥នាក់ហើយ ដែលជាលទ្ធផលនៃការផ្ទុះឡើងនៃជំងឺនេះ។
គណៈកម្មាធិការសង្គ្រោះបន្ទាន់មិនអាចឈានដល់ការឯកភាពគ្នាលើថា តើការផ្ទុះឡើងជំងឺស្វាគួរត្រូវចាត់ថ្នាក់ថាជាគ្រាអាសន្នសុខភាពសកល ឬយ៉ាងណានោះទេ។ ប៉ុន្តែទោះបីជាយ៉ាងណា លោក Tedros បានអះអាងថា ការផ្ទុះឡើងបានរីករាលដាលពាសពេញពិភពលោកយ៉ាងរហ័ស ហើយលោកបានសម្រេចចិត្តថាវាពិតជាកង្វល់ជាសកលពិតប្រាកដមែន។ ហើយការវាយតម្លៃរបស់ WHO បង្ហាញថា ហានិភ័យនៃជំងឺអ៊ុតស្វាមានកម្រិតមធ្យមនៅទូទាំងពិភពលោក និងគ្រប់តំបន់ទាំងអស់។ លើកលែងតែនៅក្នុងតំបន់អឺរ៉ុប ដែលត្រូវបានវាយតម្លៃហានិភ័យថា «កម្រិតខ្ពស់»។
លោកវេជ្ជបណ្ឌិតបានបញ្ជាក់ថា សេចក្តីប្រកាសនេះ នឹងជួយពន្លឿនការអភិវឌ្ឍន៍វ៉ាក់សាំង និងការអនុវត្តវិធានការ ដើម្បីកំណត់ការរីករាលដាល។ WHO ក៏កំពុងចេញអនុសាសន៍ដែលខ្លួនសង្ឃឹមថានឹងជំរុញឱ្យបណ្តាប្រទេសនានាចាត់វិធានការ ដើម្បីបញ្ឈប់ការចម្លង និងការពារអ្នកដែលប្រឈមនឹងហានិភ័យបំផុត។ ដោយបុរសវ័យ៥៧ឆ្នាំរូបនេះ បាននិយាយថា នេះគឺជាការផ្ទុះឡើងដែលអាចបញ្ឈប់បានជាមួយនឹងយុទ្ធសាស្ត្រដ៏ត្រឹមត្រូវ នៅក្នុងក្រុមដែលត្រូវបានចាត់ថ្នាក់ត្រឹមត្រូវ៕ (ប្រភពពី BBC)
