កូរ៉េខាងត្បូងនឹងបន្តកិច្ចប្រជុំគោលនយោបាយ ស្តីពីបញ្ហាសិទ្ធិមនុស្សនៅកូរ៉េខាងជើងក្នុងសប្តាហ៍នេះ

មន្ត្រីក្រសួងបង្រួបបង្រួមរបស់កូរ៉េខាងត្បូងបាននិយាយកាលពីថ្ងៃចន្ទថា ប្រទេសកូរ៉េខាងត្បូងនឹងរៀបចំកិច្ចប្រជុំរដ្ឋាភិបាលអន្តរទីភ្នាក់ងារមួយ ស្តីពីគោលនយោបាយសិទ្ធិមនុស្សនៅកូរ៉េខាងជើង នៅចុងសប្តាហ៍នេះជាលើកដំបូងក្នុងរយៈពេលជាងពីរឆ្នាំកន្លងមកនេះ។

កិច្ចប្រជុំនោះត្រូវបានគ្រោងធ្វើនៅថ្ងៃព្រហស្បតិ៍ ខណៈដែលរដ្ឋបាលលោក យូន ស៊ុកយុល បានផ្លាស់ប្តូរគោលជំហរសកម្មជាងមុនក្នុងការដោះស្រាយបញ្ហាសិទ្ធិរបស់កូរ៉េខាងជើងនៅក្នុងការផ្លាស់ប្តូរពីរដ្ឋបាលមុនរបស់លោក មូន ជេអ៊ីន។

អនុរដ្ឋមន្ត្រីក្រសួងបង្រួបបង្រួម លោក គីម គីវូង គ្រោងនឹងធ្វើជាប្រធាននៃកិច្ចប្រជុំដែលមានការចូលរួមពីបណ្តាមន្ត្រីជាន់ខ្ពស់នៃក្រសួងបង្រួបបង្រួម ក្រសួងការបរទេស និងក្រសួងយុត្តិធម៌នោះ។ នេះបើយោងតាមលោក ចូ ជូងហ៊ូន អ្នកនាំពាក្យក្រសួងបង្រួបបង្រួម។

លោក ចូ បាននិយាយនៅក្នុងសន្និសីទសារព័ត៌មានទៀងទាត់មួយថា «កិច្ចប្រជុំនោះនឹងពិភាក្សាអំពីការអនុវត្តគោលនយោបាយសិទ្ធិមនុស្សរបស់រដ្ឋាភិបាលកូរ៉េខាងជើង និងពិភាក្សាអំពីបញ្ហានានា រួមទាំងសេចក្តីព្រាងរបាយការណ៍របស់រដ្ឋាភិបាល ស្តីពីស្ថានភាពសិទ្ធិមនុស្សនាពេលបច្ចុប្បន្នរបស់កូរ៉េខាងជើងផងដែរ»។

កិច្ចប្រជុំនោះត្រូវបានធ្វើឡើងលើកចុងក្រោយនៅក្នុងខែឧសភា ឆ្នាំ២០២០។ វាត្រូវបានចាប់ផ្តើមនៅក្នុងខែតុលា ឆ្នាំ២០១៦ ក្រោមក្រិត្យអនុវត្តនៃច្បាប់សិទ្ធិមនុស្សនៅកូរ៉េខាងជើង។

វេទិកាសន្ទនានោះត្រូវបានរៀបចំឡើងដើម្បីបង្កើនការសម្របសម្រួលគោលនយោបាយផ្ទៃក្នុងរបស់រដ្ឋាភិបាល និងពិភាក្សាអំពីការបង្កើតវិធានការគោលនយោបាយ និងកិច្ចខិតខំប្រឹងប្រែងផ្សេងទៀតដើម្បីជួយលើកកំពស់លក្ខខណ្ឌសិទ្ធិនៅក្នុងប្រទេសផ្តាច់ការមួយនោះ។

ការបន្តនៃកិច្ចប្រជុំនេះកើតឡើងនៅពេលដែលរដ្ឋបាលលោក យូន បានចាត់វិធានការគោលនយោបាយកាន់តែខ្លាំងដើម្បីដោះស្រាយបញ្ហាសិទ្ធិមនុស្សរបស់កូរ៉េខាងជើង៕(ប្រភព ក្រសួងព័ត៌មាន)