យន្ដហោះចម្បាំងដ៏ទំនើបរបស់សហរដ្ឋអាមេរិក ធ្លាក់នៅលើមូលដ្ឋានទ័ព

យន្ដហោះចម្បាំងដ៏ទំនើបរបស់សហរដ្ឋអាមេរិក ធ្លាក់នៅលើមូលដ្ឋានទ័ព

រដ្ឋធានីវ៉ាស៊ីនតោន៖ យន្ដហោះចម្បាំងដ៏ទំនើបមួយគ្រឿង ប្រភេទ F-35 កាលពីថ្ងៃពុធ បានធ្លាក់ នៅក្នុងមូលដ្ឋានកងទ័ពអាកាសហ៊ីល (Hill) ស្ថិតនៅភាគខាងត្បូង ទីក្រុងអកដិន (Ogden) រដ្ឋយូតា (Utah) សហរដ្ឋអាមេរិក។

សារព័ត៌មានរបស់សហរដ្ឋអាមេរិក CNN បានផ្សាយ កាលពីថ្ងៃព្រហស្បតិ៍ ទី២០ ខែតុលា ថា យន្ដហោះចម្បាំងបំបាំងកាយមួយគ្រឿង ប្រភេទ F-35A Lightning II បានធ្លាក់ កាលពីវេលាម៉ោង ៦ និង ៣០នាទីល្ងាច ថ្ងៃពុធ (ម៉ោងក្នុងស្រុក) នៅប៉ែកខាងជើង ផ្លូវហោះហើរ ស្ថិតក្នុងមូលដ្ឋានកងទ័ពអាកាស Hill ។ ដោយឡែក អាកាសយានិក នៅក្នុងយន្ដហោះចម្បាំងដ៏ទំនើប បានលោតចេញ តាមឆត្រយោងដោយសុវត្ថិភាព ហើយត្រូវបញ្ជូនទៅកាន់មជ្ឈមណ្ឌលវេជ្ជសាស្ត្រ ស្ថិតក្នុងតំបន់ ដើម្បីត្រួតពិនិត្យសុខភាព។

ទោះជាយ៉ាងណា មន្រ្ដីកងទ័ពអាកាសសហរដ្ឋអាមេរិក នៅមិនទាន់បានបញ្ជាក់ អំពីមូលហេតុ នៃគ្រោះថ្នាក់នេះនៅឡើយ ព្រោះករណីនេះ កំពុងតែស្ថិតក្នុងការស៊ើបអង្កេត៕