រាជធានីភ្នំពេញ៖ ក្រសួងវប្បធម៌ និងវិចិត្រសិល្បៈ បានជំរុញឲ្យភាគីថៃ បញ្ឈប់សកម្មភាពបំផ្លិចបំផ្លាញ ក៏ដូចជា គម្រោងនានា នៅជុំវិញប្រាសាទតាក្របី ដែលជាកម្មសិទ្ធិ ស្ថិតក្នុងដែនអធិបតេយ្យភាពរបស់កម្ពុជា និង ងាកមករកការដោះស្រាយបញ្ហាព្រំដែន ដោយសន្តិវិធី និងគោរពទៅតាមសន្ធិសញ្ញាបារាំង-សៀម ឆ្នាំ១៩០៤ និង១៩០៧។

ក្រសួងវប្បធម៌ និងវិចិត្រសិល្បៈកម្ពុជា បាន និងកំពុងតែតវ៉ាប្រឆាំងនឹងសកម្មភាពយ៉ាងគឃ្លើននានារបស់ថៃ នៅប្រាសាទតាក្របី ទាំងសកម្មភាពផ្ទាល់ មកលើប្រាង្គប្រាសាទ និងការសាងសង់ហេដ្ឋារចនាសម្ព័ន្ធនានា នៅជិតប្រាសាទ។

ស្របគ្នានេះ ក្រសួងវប្បធម៌ និងវិចិត្រសិល្បៈ បានស្នើភាគីថៃ បញ្ឈប់សកម្មភាពបំផ្លិចបំផ្លាញ ក៏ដូចជា គម្រោងនានា នៅជុំវិញប្រាសាទតាក្របី ដែលជាកម្មសិទ្ធិ ស្ថិតក្នុងដែនដីអធិបតេយ្យភាពកម្ពុជា និងងាកមករកការដោះស្រាយបញ្ហាព្រំដែន ដោយសន្តិវិធី និងគោរពទៅតាមសន្ធិសញ្ញាបារាំង-សៀម ឆ្នាំ១៩០៤ និង១៩០៧។

ការលើកឡើងបែបនេះ បានកើតឡើង បន្ទាប់ពីក្រុមយោធាថៃ បានបន្តរុលចូលឈូសឆាយផ្លូវ សាងសង់លេណដ្ឋាន និងបំផ្លិចបំផ្លាញគម្រោងនានា ជុំវិញបរិវេណប្រាសាទតាក្របី ទោះបីជាបទឈប់បាញ់បានចូលជាធរមានរួចហើយក្តី។ សកម្មភាពរបស់យោធាថៃ នាពេលនេះ បានរំលោភបំពានលើច្បាប់អន្តរជាតិ និង បំពានលើបទឈប់បាញ់ ទាំងកម្រោល ដែលត្រូវបានចុះហត្ថលេខា ដោយនាយករដ្ឋមន្រ្តីកម្ពុជា-ថៃ ដោយមានសាក្សី មកពីប្រទេសមហាអំណាច ប្រធានាធិបតេយ្យសហរដ្ឋអាមេរិកលោក ដូណាល់ ត្រាំ និង នាយករដ្ឋមន្រ្តីម៉ាឡេស៊ី លោក អាន់វ៉ា អីប្រាហ៊ីម ប្រធានអាស៊ានប្តូរវេន ព្រមទំាងមានការឃ្លាំមើលពីប្រទេសមហាអំណាចចិនផងដែរ។

សេចក្តីថ្លែងការណ៍របស់ក្រសួងវប្បធម៌ ចុះថ្ងៃទី ២២ ខែមករា ឆ្នាំ ២០២៦ បានប្រកាស ប្រឆាំងជាដាច់ខាត ចំពោះការប្រើប្រាស់កម្លាំងប្រដាប់អាវុធរបស់យោធាថៃ ក្នុងការឈ្លានពានកាន់កាប់ប្រាសាទតាក្របី និងគម្រោងនានា ដែលធ្វើឱ្យប្រែប្រួលស្ថានភាពតំបន់នោះ។ សួងវប្បធម៌ ចាត់ទុកថាសកម្មភាពឈ្លានពាននេះគឺជាការរំលោភបំពានទាំងស្រុងទៅនឹងគោលការណ៍ជាមូលដ្ឋាន និងមិនអាចបដិសេធបានច្បាប់អន្តរជាតិ ដែលហាមឃាត់ការកាន់កាប់ទឹកដីដោយប្រើប្រាស់កម្លាំង៕