ប្រធានាធិបតី ត្រាំ កំពុងសម្លឹងមើលពីការផ្ដួលរំលំរបបគ្រង់គ្រង នៅប្រទេសអ៊ីរ៉ង់

រដ្ឋធានីតេអ៊ីរ៉ង់៖ ប្រធានាធិបតីសហរដ្ឋអាមេររិក លោក ដូណាល់ ត្រាំ កំពុងតែដាក់ទម្ងន់យ៉ាងខ្លាំងទៅលើជម្រើសជាច្រើន ប្រឆាំងនឹងប្រទេសអ៊ីរ៉ង់ ដោយរាប់បញ្ចូលទាំងការកំណត់គោលដៅ វាយប្រហារទៅលើកងកម្លាំសន្ដិសុខ និង ក្រុមមេដឹកនាំ នៃរបបគ្រប់គ្រងរបស់រដ្ឋាភិបាលក្រុងតេអ៊ីរ៉ង់ សម្រាប់ជួយបំផុដល់ក្រុមបាតុករឲ្យលុកលុយ ទៅលើអគារនានារបស់រដ្ឋាភិបាល។ នេះបើតាមសារព័ត៌មានរបស់អង់គ្លេស Daily Mail បានផ្សាយ កាលពីយប់ ថ្ងៃព្រហស្បតិ៍ ទី២៩ ខែមករា ឆ្នាំ២០២៦។

ប្រភពចំនួន២របស់សហរដ្ឋអាមេរិក ដែលដឹងអំពីកិច្ចពិភាក្សាស្រដៀងគ្នានេះ បានលើកឡើង ថា លោកប្រធានាធិបតី ដូណាល់ ត្រាំ ចង់បង្កើតលក្ខខណ្ឌ សម្រាប់ការផ្លាស់ប្តូររបបគ្រប់គ្រង នៅប្រទេសអ៊ីរ៉ង់ បន្ទាប់ពីការបង្រ្កាបយ៉ាងឃោរឃៅ ប្រឆាំងនឹងចលនាតវ៉ា នៅទូទាំងប្រទេស កាលពីដើមខែមករា កន្លងទៅនេះ ដោយបានសម្លាប់មនុស្ស រាប់ពាន់នាក់។ ប្រភពទាំង២នោះ បានអះអាងទៀត ថា ដើម្បីធ្វើដូច្នេះទៅបាន គឺលោកប្រធានាធិបតី ត្រាំ កំពុងតែសម្លឹងមើលជម្រើសជាច្រើនផ្សេងទៀត សម្រាប់ការវាយប្រហារ ទៅលើមេបញ្ជាការនានា និង ក្រុមទីភ្នាក់ងារជាច្រើនទៀតរបស់រដ្ឋាភិបាលអ៊ីរ៉ង់ តាមអ្វីដែលរដ្ឋាភិបាលក្រុងវ៉ាស៊ីនតោន ចាត់ទុកពួកគេទាំងនោះ ជាអ្នកទទួលខុសត្រូវ ចំពោះអំពើហិង្សា ដែលបានកើតឡើង កាលពីពេលថ្មីៗ ហើយវាជាការផ្ដល់នូវទំនុកចិត្ត ដល់ក្រុមអ្នកតវ៉ា អាចលុកលុយទៅលើអគារនានារបស់រដ្ឋាភិបាលក្រុងតេអ៊ីរ៉ង់ និង កម្លាំងសន្តិសុខរបស់ពួកគេ។

បើតាមប្រភពមួយ នៅក្នុងចំណោមប្រភពទាំង២នោះ បានសង្កត់ធ្ងន់ ថា ជម្រើសដែលត្រូវបានពិភាក្សា ដោយប្រេសិតពិសេសរបស់លោកប្រធានាធិបតី ដូណាល់ ត្រាំ ក៏រួមបញ្ចូលផងដែរនូវការវាយប្រហារទ្រង់ទ្រាយដ៏ធំ ជាមួយនឹងគោលបំណងបង្កើនឥទ្ធិពល រយៈពេលយូរ ប្រឆាំងនឹងមីស៊ីលផ្លោង ដែលអាចបាញ់ទៅដល់ទឹកដី នៃសម្ពន្ធមិត្តរបស់សហរដ្ឋអាមេរិក នៅតំបន់មជ្ឈិមបូព៌ា ឬកម្មវិធីពង្រឹងអាវុធនុយក្លេអ៊ែររបស់ខ្លួន។

ស្របគ្នានេះដែរ ក៏មានប្រភពផ្សេងៗទៀតរបស់សហរដ្ឋអាមេរិក បានរាយការណ៍ ថា លោកប្រធានាធិបតី ដូណាល់ ត្រាំ នៅមិនទាន់បានសម្រេចចិត្តចុងក្រោយ ថា នឹងត្រូវធ្វើប្រតិបត្ដិការយោធា ឬយ៉ាងណានៅឡើយ?

ជាមួយនឹងការគំរាមកំហែងដ៏ស្រួចស្រាវ ពីលោកប្រធានាធិបតី ដូណាល់ ត្រាំ នោះ កងនាវាផ្ទុកយន្ដហោះវាយប្រហារ USS Abraham Lincoln (យូអេសអេស អាប្រាហាម លីនខូល) និង កងនាវាពិឃាដបំពាក់មីស៊ីលនាំផ្លូវជាច្រើនគ្រឿង បានធ្វើដំណើរទៅដល់តំបន់មជ្ឈិមបូព៌ា នៅសប្តាហ៍នេះ។ ការមកដល់ នៃកងទ្រព្យសម្បត្ដិការពារជាតិដ៏ធំសម្បើមរបស់សហរដ្ឋអាមេរិក កំពុងតែពង្រឹងសមត្ថភាពរបស់លោកប្រធានាធិបតី ដូណាល់ ត្រាំ សម្រាប់ប្រតិបត្ដិការយោធា បន្ទាប់ពីលោកប្រធានាធិបតី បានគំរាមម្តងហើយម្តងទៀត អំពីអន្តរាគមន៍យោធា ប្រឆាំងនឹងការបង្ក្រាបយ៉ាងឃោរឃៅរបស់រដ្ឋាភិបាលក្រុងតេអ៊ីរ៉ង់ ទៅលើក្រុមអ្នកតវ៉ា។

មន្ត្រី៤នាក់របស់ប្រទេសអារ៉ាប់ ហើយមន្រ្ដីការទូតលោកខាងលិចចំនួន៣នាក់ និងប្រភពមកពីមន្រ្ដីជាន់ខ្ពស់លោកខាងលិច ដែលរដ្ឋាភិបាលបានសង្ខេប អំពីកិច្ចពិភាក្សានោះ បានលើកឡើង ថា ពួកគេមានការព្រួយបារម្ភយ៉ាងខ្លាំង នៅត្រង់ថា ការធ្វើបាតុកម្ម នៅតាមផ្លូវបែបនេះ អាចនឹងធ្វើឱ្យភាពចលាចលថយចុះ បន្ទាប់ពីការបង្ក្រាបយ៉ាងបង្ហូរឈាមទ្រង់ទ្រាយធំ ដោយអាជ្ញាធរអ៊ីរ៉ង់ ចាប់តាំងពីបដិវត្តអ៊ិស្លាម នាអំឡុងឆ្នាំ១៩៧៩ រហូតមក។
លោកប្រធានាធិបតី ដូណាល់ ត្រាំ បានគំរាម ថា ការវាយប្រហារណាមួយរបស់សហរដ្ឋអាមេរិក នាពេលខាងមុខ នឹងធ្ងន់ធ្ងរជាងយុទ្ធនាការទម្លាក់គ្រាប់បែក ប្រឆាំងនឹងរោងចក្រនុយក្លេអ៊ែរ ចំនួន៣កន្លែង នៅក្នុងប្រទេសអ៊ីរ៉ង់ កាលពីខែមិថុនា ឆ្នាំ២០២៥កន្លងទៅនេះ។

ទន្ទឹមគ្នានេះដែរ លោកប្រធានាធិបតី ដូណាល់ ត្រាំ បានពិពណ៌នា ថា កងនាវាចម្បាំងដ៏ធំ នៅតំបន់មជ្ឈិមបូព៌ា ក្លាយជាកងកម្លាំងដ៏ធំសម្បើម ដោយមានទាំងកងទ័ពអាកាស ជើងទឹក និង ជើងគោក កំពុងតែធ្វើដំណើរទៅកាន់ប្រទេសអ៊ីរ៉ង់។ កងកម្លាំងដ៏ធំទាំងនេះ កំពុងតែធ្វើដំណើរយ៉ាងឆាប់រហ័ស ដោយមានថាមពល ភាពរីករាយ និងមានគោលបំណងដ៏ជាក់លាក់ ហើយវាជាកងនាវាដ៏ធំជាងគេ ដឹកនាំដោយនាវាផ្ទុកយន្តហោះវាយប្រហារដ៏អស្ចារ្យ USS Abraham Lincoln ដែលបានបញ្ជូនទៅកាន់ប្រទេសវេណេហ្ស៊ុយអេឡា កាលពីពេលកន្លងទៅនេះ។ ដូច្នេះសកម្មភាពបែបនេះ ក៏អាចដូចគ្នានឹងវេណេហ្ស៊ុយអេឡាផងដែរ ព្រោះអ្វីៗបានត្រៀមខ្លួនរួចជាស្រេច ជាមួយនឹងឆន្ទៈ អាចបំពេញបេសកកម្មរបស់ខ្លួន បានយ៉ាងឆាប់រហ័ស ហើយដោយល្បឿន និងខ្លាំងក្លាបំផុត ប្រសិនបើករណីចាំបាច់បំផុត។

លោកប្រធានាធិបតី ដូណាល់ ត្រាំ បានសង្កត់ធ្ងន់ ថា៖«ពេលវេលាជិតអស់ហើយ វាពិតជាមានសារៈសំខាន់ខ្លាំងណាស់! ដូចអ្វីដែលខ្ញុំបានប្រាប់អ៊ីរ៉ង់ ម្តងទៀត ថា ត្រូវតែបង្កើតកិច្ចព្រមព្រៀង! តែពួកគេមិនបានធ្វើនោះទេ។ ដូច្នេះការសម្រេចចុងក្រោយ មានតែធ្វើប្រតិបត្តិការ នាពេលពាក់កណ្តាលអធ្រាត្រ ដែលជាការបំផ្លិចបំផ្លាញដ៏ធំ នៅប្រទេសអ៊ីរ៉ង់។ ការវាយប្រហារលើកក្រោយ នឹងកាន់តែអាក្រក់បំផុត! សូមកុំឲ្យកើតមានម្តងទៀតអី»៕