អគ្គីលេបត្របាក់ព្រះវិហារបុរាណ មានអាយុកាលរាប់សតវត្ស នៅប្រទេសថៃ
រាជធានីបាងកក៖ អាជ្ញាធរថៃ បានបញ្ជាក់ ថា ព្រះវិហារបុរាណតាមរចនាប័ទ្មភូមា ដែលមានអាយុរាប់សតវត្ស ស្ថិតក្នុងខេត្តឡាមផាង (Lampang) ប្រទេសថៃ ត្រូវបានភ្លើងឆេះ អស់កាលពីព្រឹក ថ្ងៃអាទិត្យ។ នេះបើតាមកាសែតរបស់ថៃ Khaosod បានផ្សាយ កាលពីព្រឹក ថ្ងៃចន្ទ ទី២ ខែកុម្ភៈ ឆ្នាំ២០២៦។
អគ្គិភ័យនេះ បានកើតឡើង នៅវេលាម៉ោង៦ និង ៣០នាទីព្រឹក ថ្ងៃអាទិត្យ ទី១ ខែកុម្ភៈ ឆ្នាំ២០២៦ នៅវត្តម៉ុន ពូ យ៉ាក (Wat Mon Pu Yak) ហៅ វត្ដសានថាន (Wat Santhan) ស្ថិតក្នុងសហគមន៍ព្រះបាត២ ក្រុងឡាំប៉ាង (Lampang city)។ ភ្លាមៗនោះ អាជ្ញាធរបានបញ្ជូនរថយន្តពន្លត់អគ្គិភ័យជាង១០គ្រឿង ចេញទៅធ្វើអន្ដរាគមន៍បាញ់ទឹកពន្លត់។
ក្រុមអ្នកពន្លត់អគ្គិភ័យ បានប្រយុទ្ធនឹងអណ្តាតភ្លើង ដែលកំពុងតែឆាបឆេះព្រះវិហារបុរាណយ៉ាងសន្ធោសន្ធៅ ដែលជាសំណង់ធ្វើពីឈើ និងក្រាលឥដ្ឋ ហើយត្រូវបានសាងសង់ឡើង តាមរចនាប័ទ្មស្ថាបត្យកម្មភូមា។ ព្រះវិហារ រួមជាមួយនឹងវត្ថុបុរាណ ទ្រព្យសម្បត្តិនៅក្នុងវិហារ និងព្រះពុទ្ធរូបអង្គធំ ត្រូវបានបំផ្លាញទាំងស្រុង នៅក្នុងគ្រោះអគ្គិភ័យនេះ។
អាជ្ញាធរថៃ បានបញ្ជាក់ ថា ដំបូងឡើយ ក្រុមមន្ត្រីពន្លត់អគ្គិភ័យ មានការព្រួយបារម្ភខ្លាំង ចំពោះសុវត្ថិភាពរបស់ព្រះចៅអធិការ ដែលគង់នៅតែមួយអង្គឯង នៅក្នុងព្រះវិហារ។ ប៉ុន្តែក្រោយមក ទើបដឹង ថា ព្រះអង្គ បាននិមន្ដទៅចូលរួមក្នុងពិធីសាសនាមួយ នៅឯខេត្តតាក់ (Tak) ហើយក៏មិនអ្វីកើតឡើង ចំពោះព្រះអង្គនោះដែរ។ បច្ចុប្បន្ន អាជ្ញាធរកំពុងតែស៊ើបអង្កេត ពីករណីគ្រោះអគ្គិភ័យនេះ៕ ប្រែសម្រួល ដោយលោក ណុប ស៊ីនួន