ការស្ទង់មតិមួយ បង្ហាញពីនាយករដ្ឋមន្រ្ដីស្រីជប៉ុន អាចនឹងឈ្នះភ្លូកទឹកភ្លូកដី

រាជធានីតូក្យូ៖ កាសែតជប៉ុន Asahi (អាសាហ៊ី) កាលពីថ្ងៃអាទិត្យ បានបង្ហាញអំពីការស្ទង់មតិរបស់ខ្លួន ជាមួយនឹងលទ្ធផល បង្ហាញ ថា ​គណបក្សដែលកំពុងតែគ្រប់គ្រងអំណាចនៅជប៉ុន គឺ​លោកនាយករដ្ឋមន្ត្រី​ សាណា តាកៃឈិ (Sanae Takaichi) ទំនងនឹងជាទទួលបានជ័យជម្នះភ្លូកទឹកភ្លូកដី នៅក្នុងការបោះឆ្នោតសភាជាន់ទាប ​នៅថ្ងៃទី៨ ខែកុម្ភៈ។ នេះបើតាមគេហទំព័រទូរទស្សន៍របស់សិង្ហបុរី Channel News Asia បានផ្សាយ កាលពីព្រឹក ថ្ងៃចន្ទ ទី២ ខែកុម្ភៈ ឆ្នាំ២០២៦។

ការស្ទង់មតិនេះ បានបង្ហាញអំពីការគាំទ្រដ៏​រឹងមាំ នៅក្នុងការបោះឆ្នោត ជាមួយនឹងលទ្ធផល អាចទាយទុកជាមុន ថា គណបក្សរបស់លោកស្រី តាកៃឈិ និង លោកស្រី អាចនឹងបន្ដអាណត្ដិរបស់លោកស្រី ​សម្រាប់ការអនុវត្ដនូវគោលនយោបាយសារពើពន្ធ​របស់លោកស្រី ដែលអាចបង្កើនការព្រួយបារម្ភ អំពីហិរញ្ញវត្ថុរបស់ប្រទេសជប៉ុន។​

បើតាមការស្ទង់មតិរបស់កាសែត Asahi បានឲ្យដឹង ថា គណបក្សប្រជាធិបតេយ្យសេរីនិយម (LDP) របស់លោកស្រី តាកៃឈិ ទំនងជានឹងទទួលបានកៅអី ​ភាគច្រើន លើសពី២៣៣អាសនៈ នៅក្នុងចំណោមអាសនៈទាំង៤៦៥កៅអី នៅក្នុងសភាជាន់ទាបរបស់ជប៉ុន។ ចំនួននេះ នឹងកើនឡើង លើសពីអាសនៈបច្ចុប្បន្ន ចំនួន១៩៨កៅអី។ ប៉ុន្ដែបើគិតជាមួយគណបក្សជាដៃគូ នៅក្នុងរដ្ឋាភិបាលចម្រុះរបស់លោកស្រី តាកៃឈិ អាចនឹងទទួលបានអាសនៈ ជាង៣០០កៅអី។

​​លោកស្រី សាណា តាកៃឈិ (Sanae Takaichi) គ្រាន់តែបានចូលមកកាន់តំណែងនាយករដ្ឋមន្រ្ដីជប៉ុន មិនបានប៉ុន្មានសប្ដាហ៍ផង ក៏ក្លាយជាចំណុចស្នូល នៃភាពតានតឹងការទូតដ៏ខ្លាំងក្លាបំផុត រវាងរដ្ឋាភិបាលក្រុងតូក្យូ និង ក្រុងប៉េកាំង​ ក្នុងរយៈពេលជាងមួយទសវត្សរ៍កន្លងមកនេះ។ លោកស្រី នាយករដ្ឋមន្រ្ដី តាកៃឈិ បាន​បង្ហាញជាសាធារណៈ អំពីយុទ្ធសាស្រ្ដរបស់ក្រុងតូក្យូ អាចឆ្លើយតបនឹងការវាយប្រហាររបស់ចិន លុកលុយទៅលើកោះតៃវ៉ាន់ ដែលគ្រប់គ្រង ដោយខ្លួនឯងតាមបែបប្រជាធិបតេយ្យ តាមអ្វីដែលចិន តែងតែអះអាងជាទឹកដីរបស់ខ្លួន។

ជាប្រតិកម្មដ៏ខ្លាំងក្លាភ្លាមៗនោះ រដ្ឋាភិបាលក្រុងប៉េកាំង បានទាមទារឲ្យលោកស្រី នាយករដ្ឋមន្រ្ដី តាកៃឈិ លុបចោលនូវការអះអាងរបស់លោកស្រី។ ប៉ុន្ដែលោកស្រី នាយករដ្ឋមន្រ្ដី មិនបានលុបចោលនូវអ្វីដែលលោកស្រី បានថ្លែងទៅកាន់សភាជប៉ុន ចំពោះវិធានការយោធារបស់លោកស្រី ប្រឆាំងនឹងការលុកលុយរបស់ចិន ជុំវិញបញ្ហា​កោះតៃវ៉ាន់ នោះឡើយ។ ទន្ទឹមគ្នានេះដែរ រដ្ឋាភិបាលក្រុងប៉េកាំង បានដាក់ចេញនូវវិធានការ សងសឹកជាបន្តបន្ទាប់ ដែលកំពុងតែចាប់ផ្តើមថ្លឹងថ្លែង ប្រឆាំងនឹងប្រទេសមហាសេដ្ឋកិច្ចដ៏បំផុតលំដាប់លេខ៤របស់ពិភពលោកមួយនេះ។​​

លោកស្រី តាកៃឈិ បានបញ្ជាក់ ថា លោកស្រី នឹងលាលែងពីតំណែង ប្រសិនបើរដ្ឋាភិបាលចម្រុះរបស់លោកស្រី ចាញ់ភាគច្រើន៕ ប្រែសម្រួលដោយលោក ណុប ស៊ីនួន