គណបក្សភឿថៃ និងត្រកូលស៊ីណាវ៉ាត្រា ប្រឈមនឹងការសាកល្បងដណ្ដើមជ័យជម្នះជាថ្មីនៅថៃ
រាជធានីបាងកក៖ អស់រយៈពេលជាងពីរទសវត្សរ៍កន្លងមកនេះ គ្រួសារត្រកូល ស៊ីណាវ៉ាត្រា បានកំណត់នយោបាយបោះឆ្នោត នៅក្នុងប្រទេសថៃ ហើយថា តើគណបក្សភឿថៃរបស់ពួកគេ នឹងបន្តរក្សាប្រជាប្រិយបែបនេះដែរឬទេ ខណៈប្រជាជនថៃ នឹងទៅបោះឆ្នោត នៅថ្ងៃអាទិត្យ ទី៨ ខែកុម្ភៈ ខាងមុខនេះ។
បណ្ដាញទូរទស្សន៍របស់សិង្ហបុរី CNA បានផ្សាយ នៅថ្ងៃអង្គារ ទី៣ ខែកុម្ភៈ ឆ្នាំ២០២៦ ថា លោក ថាក់ស៊ីន ស៊ីណាវ៉ាត្រា បានជាប់ឆ្នោត ក្លាយជានាយករដ្ឋមន្ត្រីថៃ នៅដើមទសវត្សរ៍ ឆ្នាំ២000។ មេដឹកនាំដ៏មានប្រជាប្រិយភាពរបស់ប្រទេសថៃ រូបនេះ បានទទួលការគាំទ្រយ៉ាងខ្លាំង ពីអ្នកបោះឆ្នោត នៅតាមជនបទ និងក្រុមកម្មករ។
ទោះជាយ៉ាងណាក៏ដោយ ឥស្សរជននយោបាយដ៏មានប្រជាប្រិយភាព មកពីត្រកូល ស៊ីណាវ៉ាត្រា ត្រូវបានគេបណ្ដេញចេញពីអំណាច ជាបន្ដបន្ទាប់ រួមមាន៖ ១-លោក ថាក់ស៊ីន បានកាន់អំណាច ចន្លោះពីឆ្នាំ២០០១ដល់២០០៦, ២-លោកស្រី យីងឡាក់ ប្អូនស្រីរបស់លោក ថាក់ស៊ីន បានកាន់អំណាចចន្លោះពីឆ្នាំ២០១១ដល់២០១៤ និង ៣-លោកស្រី ផេថុងថាន កូនស្រីរបស់លោក ថាក់ស៊ីន បានកាន់អំណាចមួយរយៈខ្លី ក៏ត្រូវបានតុលាការដកហូតអំណាច។
ដោយឡែក ក្រុមអ្នកជំនាញនយោបាយ បានប្រាប់ CNA ថា ការបោះឆ្នោត នាពេលខាងមុខ នឹងក្លាយជាការសាកល្បង ថាតើត្រកូល ស៊ីណាវ៉ាត្រា នឹងនៅតែអាចដណ្ដើមអំណាចបាន នៅក្នុងប្រទេសថៃ នាពេលបច្ចុប្បន្នដែរឬអត់?
លោក ណាពង់ ចាទូស្រ៊ីភីតាក់ (Napon Jatusripitak) អ្នកសម្របសម្រួលកម្មវិធីសិក្សារបស់ប្រទេសថៃ នៅវិទ្យាស្ថានអ៊ីស៊ាស-យូសូហ្វ អ៊ីសាក់ (ISEAS-Yusof Ishak) មានមូលដ្ឋាននៅប្រទេសសិង្ហបុរី បានបញ្ជាក់ ថា ការរះឡើងនៅក្នុងឆាកនយោបាយរបស់លោក ថាក់ស៊ីន បានធ្វើឱ្យអ្នកបោះឆ្នោតមួយជំនាន់ៗ មានអារម្មណ៍ជាលើកដំបូង ថា នយោបាយ នឹងវិវឌ្ឍទៅមុខ សម្រាប់ពួកគេ។ នេះជាការផ្លាស់ប្តូរដ៏ធំដំបូងបង្អស់ នៅក្នុងទិដ្ឋភាពនយោបាយរបស់ថៃ ហើយវាបានធ្វើឲ្យមានភាពល្អប្រសើរឡើងនូវស្ថានភាពរស់នៅមួយផ្នែកធំរបស់ប្រជាជនថៃ ជាពិសេស អ្នកស្ថិតក្នុងវណ្ណៈកម្មករ និងសហគមន៍ជនបទ។
ត្រកូល ស៊ីណាវ៉ាត្រា បានកំណត់នយោបាយបោះឆ្នោតថៃ អស់រយៈពេលជាងពីរទសវត្សរ៍កន្លងមកហើយ ដោយបានកៀរគរអ្នកបោះឆ្នោត នៅតាមជនបទ កែប្រែការរំពឹងទុក អំពីសុខុមាលភាព និងបង្កការតស៊ូយ៉ាងខ្លាំង ពីឥស្សរជនអភិរក្សនិយម៕