ក្រឹត្យថ្មីផ្ដោតលើសុវត្ថិភាពម្ហូបអាហារ នៅវៀតណាម បង្កការកកស្ទះទំនិញនៅតាមព្រំដែន
រដ្ឋធានីហាណូយ៖ រហូតមកដល់ពេលនេះ វៀតណាម បានចេញច្បាប់ថ្មីមួយ សម្រាប់បង្កើនកម្រិតសុវត្ថិភាពចំណីអាហារ ប៉ុន្ដែនៅពេលការអនុវត្ដបានចាប់ផ្ដើមឡើង ធ្វើឲ្យកកស្ទះទំនិញកសិកម្មនាំចូល រហូតដល់៣០០ ០០០តោន នៅទូទាំងប្រទេស។
បើតាមប្រព័ន្ធផ្សព្វផ្សាយរបស់វៀតណាម បានរាយការណ៍ ថា ក្រសួងកសិកម្មវៀតណាម បានបញ្ជាក់ នៅក្នុងរបាយការណ៍ កាលពីថ្ងៃទី១ ខែកុម្ភៈ ឆ្នាំ២០២៦ ជូននាយករដ្ឋមន្ត្រី លោកផាម មិញ ឈិញ ថា ក្រឹត្យលេខ 46/2026/NĐ-CP ដែលបានចូលជាធរមាន កាលពីថ្ងៃទី២៦ ខែមករា បានអនុវត្តយ៉ាងឆាប់រហ័ស។ ប៉ុន្ដែការអនុវត្ដច្បាប់នេះ បានធ្វើឱ្យទំនិញនាំចូល នៅតាមកន្លែងត្រួតពិនិត្យ ទាំងផ្លូកគោក ផ្លូវសមុទ្រ និង ផ្លូវអាកាស មានការកកស្ទះយ៉ាងខ្លាំង ហើយភាគច្រើន ជាបន្លែ ផ្លែឈើ អង្ករ ដំឡូងមី និងម្ហូបអាហារកែច្នៃ។
ប្រទេសវៀតណាម បានចេញច្បាប់ថ្មី ជាមួយនឹងការរឹតបន្តឹង លើការគ្រប់គ្រងចំណីអាហារប្រកបដោយសុវត្ថិភាព បន្ទាប់ពីអាជ្ញាធរបានរកឃើញ អំពីផលប៉ះពាល់ដល់សុវត្ថិភាពចំណីអាហារ កាលពីពេលថ្មីៗនេះ។ ទន្ទឹមគ្នានេះ អាជ្ញាធរបានព្រមាន ថា ក្រឹត្យថ្មីនេះនឹងមានផលប៉ះពាល់ផងដែរ។
ក្រោមច្បាប់ថ្មី ការដឹកជញ្ជូនចំណីអាហារនាំចូលភាគច្រើន ត្រូវតែឆ្លងកាត់ការត្រួតពិនិត្យឯកសារ ការត្រួតពិនិត្យរូបវន្ត និងការធ្វើតេស្តនៅតាមមន្ទីរពិសោធន៍ មុនពេលឆ្លងកាត់គយ។ ជា លទ្ធផល នៃការធ្វើតេស្តនេះ នឹងត្រូវចំណាយពេល ចន្លោះពី៥-៧ ថ្ងៃ។ ប៉ុន្តែច្រកព្រំដែន ភាគច្រើន ជាពិសេស ច្រកឆ្លងកាត់តាមផ្លូវគោក មិនមានមន្ទីរពិសោធន៍នៅនឹងកន្លែង ដែលធ្វើឱ្យដំណើរការត្រួតពិនិត្យមានការយឺតយ៉ាវយ៉ាងខ្លាំង។
សកម្មភាពបែបនេះ កំពុងតែបង្កើតឲ្យមានភាពស្មុគស្មាញកាន់តែខ្លាំងឡើងបន្ថែមទៀត។ ទន្ទឹមគ្នានេះ សមត្ថកិច្ចជំនាញអធិការកិច្ច ក៏ខ្វះការណែនាំឲ្យបានច្បាស់លាស់ អំពីសូចនាករសុវត្ថិភាពណាដែលត្រូវធ្វើតេស្ត ខណៈតម្រូវការថ្មី សម្រាប់អ្នកនាំចូលផលិតផលស្រស់ៗដាក់ស្នើឯកសារ«ស្តង់ដារផលិតផល» នៅកកស្ទះ ដោយសារតែគ្មានគំរូផ្លូវការ។
ដោយឡែក ក្រសួងកសិកម្មវៀតណាម បានបញ្ជាក់ ថា ក្រសួង បានធ្វើការជាមួយអាជ្ញាធរមូលដ្ឋាន និងភ្នាក់ងារស្ដុកទំនិញ ដើម្បីបន្ធូរបន្ថយនូវការកកស្ទះនេះ។ ប៉ុន្ដែទំនិញដែលបានកកស្ទះ កាលពីថ្ងៃទី ៣១ ខែមករា បានដោះស្រាយរួចរាល់ហើយ។ ប៉ុន្ដែក្រសួងកសិកម្មវៀតណាម ក៏បានព្រមាន ថា បញ្ហាកកស្ទះទំនិញបែបនេះ អាចនឹងកើតឡើងសាជាថ្មី បើគ្មានដំណោះស្រាយបន្ទាន់។
ទន្ទឹមគ្នានេះ ក្រសួងកសិកម្មវៀតណាម បានអំពាវនាវឱ្យរដ្ឋាភិបាល កែសម្រួលក្រឹត្យលេខ ៤៦ជាបន្ទាន់ និងចេញការណែនាំជាបណ្តោះអាសន្ន សម្រាប់ធ្វើឲ្យការអនុវត្តច្បាប់ អាចដំណើរការទៅបាន។ មួយវិញទៀត ការពិចារណា គួរតែធ្វើវិមជ្ឈការការត្រួតពិនិត្យ ទៅកាន់អាជ្ញាធរខេត្ត សម្រាប់ការដោះស្រាយ តាមស្ថានភាពដែលអាចបត់បែនបាន៕