អង្គការណាតូ ចាប់ផ្ដើមប្រតិបត្ដិការ នៅតំបន់អាក់ទិក
ទីក្រុងប៊្រុសសែលស៍ (Brussels)៖ មហិច្ឆតារបស់ប្រធានាធិបតីសហរដ្ឋអាមេរិក លោក ដូណាល់ ត្រាំ នៅក្នុងការកញ្ឆក់យកហ្គ្រីនឡែនដ៍ (Greenland) ដែលមានទំហំជាង២លានគីឡូម៉ែត្រការ៉េ ចេញពីដៃរបស់ដាណឺម៉ាក បានធ្វើឲ្យការរង្គោះរង្គើយ៉ាងខ្លាំង នៅក្នុងចំណោមសម្ពន្ធមិត្តរបស់រដ្ឋាភិបាលក្រុងវ៉ាស៊ីនតោន និង អង្គការណាតូ ប៉ុន្ដែឥឡូវ អង្គការសម្ពន្ធមិត្តយោធាអន្ដររដ្ឋាភិបាលឆ្លងទ្វីបមួយនេះ កំពុងតែកំណត់ផែនការបេសកកម្មរបស់ខ្លួន នៅលើមហាកោះយក្សរបស់ពិភពលោកមួយនេ។
បណ្ដាញទូរទស្សន៍ គ្រប់គ្រងដោយរដ្ឋអាល្លឺម៉ង់ DW បានផ្សាយ នៅថ្ងៃពុធ ទី៤ ខែកុម្ភៈ ឆ្នាំ២០២៦ ថា អង្គការណាតូ កាលពីថ្ងៃអង្គារ បានបញ្ជាក់ ថា៖«ផែនការនានារបស់អង្គការសម្ពន្ធមិត្តយោធាអន្ដររដ្ឋាភិបាលឆ្លងទ្វីបអាត្លង់ទិក កំពុងតែដំណើរការ សម្រាប់បេសកកម្ម នៅតំបន់អាក់ទិក នៅក្នុងរយៈពេលមួយសប្តាហ៍ខាងមុខនេះ។ វិធានការទាំងនេះ បានកើតឡើង បន្ទាប់ពីលោកប្រធានាធិបតី ដូណាល់ ត្រាំ បានបំភ័ន្ដដល់សម្ពន្ធភាពជាយុទ្ធសាស្ត្រ ជាមួយនឹងការអះអាង ថា សហរដ្ឋអាមេរិក ត្រូវការគ្រប់គ្រងកោះហ្គ្រីនឡែនដ៍ ដើម្បីបញ្ចៀសនូវការព្រួយបារម្ភ លើសន្តិសុខជាតិរបស់ខ្លួន ដោយមិនបានបញ្ជាក់ ថា មកពីរុស្ស៊ី និងចិនឬចិននោះឡើយ។
លោក អូទីន អូដូនណែល (Martin O’Donnell) អ្នកនាំពាក្យជាន់ខ្ពស់ នៃទីស្នាក់ការកណ្ដាលរបស់អង្គការណាតូ ដែលជាសម្ពន្ធមិត្តនៃប្រទេសមហាអំណាចអឺរ៉ុប បានប្រាប់ដល់អ្នកយកព័ត៌មាន ថា៖«សកម្មភាពបង្កើនការប្រុងប្រយ័ត្នរបស់អង្គការណាតូ នឹងពង្រឹងបន្ថែមទៀតនូវឥរិយាបថរបស់ខ្លួន នៅតំបន់អាក់ទិក និង មានការប្រុងជើងការខ្ពស់បំផុត។ ប៉ុន្ដែអ្នកនាំពាក្យរូបនេះ មិនបានផ្តល់ព័ត៌មានលម្អិតបន្ថែមនោះទេ ព្រោះផែនការនេះទើបនឹងចាប់ផ្តើម។
ទន្ទឹមគ្នានេះ អង្គការណាតូ ក៏បានបង្ហាញច្បាស់ ថាតើសមយុទ្ធនេះ នឹងប្រព្រឹត្តទៅនៅទីណានោះឡើយ។ បច្ចុប្បន្ន ប្រទេសដាណឺម៉ាក កំពុងតែដឹកនាំសមយុទ្ធរបស់អង្គការណាតូ បន្ដធ្វើ នៅលើកោះហ្គ្រីនឡែនដ៍ តាមអ្វីដែលគេហៅឈ្មោះ «ប្រតិបត្ដិការតស៊ូអាក់ទិក»។
ទស្សនាវដ្តីរបស់អាល្លឺម៉ង់ Spiegel (ស្ពែហ្គេល) បានរាយការណ៍មុនដំបូងអំពីផែនការនេះ ថាមេបញ្ជាការរបស់អង្គការអង្គការណាតូ គឺឧត្តមសេនីយ៍កងទ័ពសហរដ្ឋអាមេរិក លោក អាឡិក្សឹស ជី.ហ្គ្រីនខេវិច (Alexus G. Grynkewich) បានបញ្ជាឱ្យមានផែនការជាក់ស្តែង ចាប់ផ្តើមសម្រាប់បេសកកម្មមួយ ឈ្មោះ សែនទ្រីអាក់ទិក (Arctic Sentry)។
ទស្សនាវដ្ដីដដែលនេះ បានរាយការណ៍ទៀត ថា ក្រុមរដ្ឋមន្ត្រីក្រសួងការពារជាតិរបស់អង្គការណាតូ អាចជួបប្រជុំគ្នា នៅក្នុងរយៈពេលប៉ុន្មានសប្តាហ៍ខាងមុខ នៅទីក្រុងប៊្រូសសែលស៍ (Brussels) សម្រាប់ការពិគ្រោះយោបល់លើផែនការបឋម នៃប្រតិបត្តិការនេះ។
ដោយឡែក អគ្គលេខាធិការអង្គការណាតូ លោក ម៉ាក រូតតេ (Mark Rutte) បានបញ្ជាក់ ថា គាត់បានឈានដល់កិច្ចព្រមព្រៀង ក្រោមក្របខ័ណ្ឌដែលនឹងធានាផលប្រយោជន៍របស់សហរដ្ឋអាមេរិក ហើយហាក់ដូចជា បដិសេធ ចំពោះការគំរាមកំហែងរបស់លោកប្រធានាធិបតី ក្នុងការប្រើប្រាស់កម្លាំង។ ប្រមុខអង្គការណាតូ ក៏បានសង្កត់ធ្ងន់ ថា គាត់បានពិភាក្សាជាមួយលោកប្រធានាធិបតី ត្រាំ អំពីរបៀបដែលសម្ពន្ធមិត្តណាតូ អាចធ្វើការរួមគ្នា ដើម្បីធានាសន្តិសុខតំបន់អាក់ទិក។
ដោយឡែក លោក ហ្សង់ ហ្វ្រេដេរីក នៀលសេន (Jens-Frederik Nielsen) នាយករដ្ឋមន្រ្ដីកោះហ្គ្រីនឡែនដ៍ កាលពីថ្ងៃចន្ទ បានព្រមាន ថា សហរដ្ឋអាមេរិក នៅតែបន្តស្វែងរកផ្លូវទៅកាន់ភាពជាម្ចាស់ និងការគ្រប់គ្រងនៅលើហ្គ្រីនឡែនដ៍របស់ខ្លួន៕