ពិភពលោកនឹងមានគ្រោះធំ បើអាមេរិក-រុស្ស៊ី មិនបន្ដកិច្ចព្រមព្រៀងនុយក្លេអ៊ែរ

រដ្ឋធានីវ៉ាស៊ីនតោន៖ ស្របពេលសន្ធិសញ្ញាកាត់បន្ថយអាវុធមហាប្រល័យលោក រវាងសហរដ្ឋអាមេរិក និងរុស្ស៊ី ​ត្រូវផុតកំណត់នោះ ពិភពលោក នឹងដើរដល់ចំណុចដ៏គ្រោះថ្នាក់បំផុត ហើយការរត់ប្រណាំងអាវុធនុយក្លេអ៊ែរ អាចនឹងចាប់ផ្ដើមជាថ្មី ប៉ុន្ដែឥឡូវ ប្រមុខអង្គការសហប្រជាជាតិ កំពុងតែជំរុញឲ្យប្រទេសមហាអំណាចយោធកំពូលរបស់ពិភពលោកទាំង២នេះ ចាប់ផ្ដើមបង្កើតកិច្ចព្រមព្រៀងឡើងវិញ។

ទីភ្នាក់ងារសារព័ត៌មានបារាំង AFP បានផ្សាយ នៅថ្ងៃព្រហស្បតិ៍ ទី៥ ខែកុម្ភៈ ឆ្នាំ២០២៦ ថា លោក អង់តូនីញ៉ូ ហ្គូទែរ៉េស (Antonio Guterres) អគ្គលេខាធិការអង្គការសហប្រជាជាតិ ​ កាលពីថ្ងៃពុធ ​បានជំរុញឱ្យសហរដ្ឋអាមេរិក និងរុស្ស៉ី ចុះហត្ថលេខាលើកិច្ចព្រមព្រៀងនុយក្លេអ៊ែរថ្មីមួយជាបន្ទាន់ ព្រោះសន្ធិសញ្ញាកាត់បន្ថយសព្វាវុធនុយក្លេអ៊ែរ ហៅកាត់​ ​New START (ញូវស្ដាត) ​នឹងត្រូវអស់សុពលភាព។ ការមិនបន្ដចុះកិច្ចព្រមព្រៀងអាវុធនុយក្លេអ៊ែរ ដែលមានស្រាប់ ​នឹងធ្វើឲ្យ​គ្រោះថ្នាក់ដល់សន្តិភាព និងសន្តិសុខអន្តរជាតិ។​

សន្ធិសញ្ញា​ ​New START នឹងត្រូវផុតកំណត់ នៅត្រឹមថ្ងៃព្រហស្បតិ៍ ទី៥ ខែកុម្ភៈ។ ​នេះជាការ​បើកផ្លូវឱ្យសហរដ្ឋអាមេរិក និងរុស្ស៉ី ពង្រីកឃ្លាំងអាវុធនុយក្លេអ៊ែររបស់ខ្លួនឡើងវិញ ហើយក៏លែង​មានការរឹតត្បិតលើការផលិតអាវុធមហាប្រល័យលោកបន្ដទៀត។

ប្រមុខអង្គការសហប្រជាជាតិ បានបញ្ជាក់ នៅក្នុងសេចក្ដីថ្លែងការណ៍មួយ ​ថា៖​«ជាលើកដំបូងនៅក្នុងរយៈពេលជាងកន្លះសតវត្ស​កន្លងមកនេះ យើងកំពុងតែប្រឈមមុខនឹងពិភពលោកមួយ ដែលមិនមានការរឹតត្បិត ឬដាក់កំហិតណាមួយ លើឃ្លាំងអាវុធ​នុយក្លេអ៊ែរយុទ្ធសាស្រ្ដរបស់សហព័ន្ធន៍រុស្ស៉ី និងសហរដ្ឋអាមេរិក​។​ សន្ធិសញ្ញា New START និងសន្ធិសញ្ញាគ្រប់គ្រងអាវុធផ្សេងៗទៀត បានចូលរួមចំណែកយ៉ាងសំខាន់​ នៅក្នុងការធ្វើឱ្យល្អប្រសើរឡើងវិញនូវសន្តិសុខ​របស់ពិភពលោក។

ទន្ទឹមគ្នានេះ ប្រមុខអង្គការសហប្រជាជាតិ ​បានអំពាវនាវដល់​សហរដ្ឋអាមេរិក និងរុស្ស៉ី វិលត្រឡប់ទៅរកតុចរចាជាថ្មី ហើយមិនត្រូវពន្យារពេល និងចុះហត្ថលេខាលើកិច្ចព្រមព្រៀងអាវុធនុយក្លេអ៊ែរជាំថ្មី​ឱ្យបានឆាប់បំផុត។

​សន្ធិសញ្ញា New START ត្រូវបានចុះហត្ថលេខាជាលើកដំបូង នា​ឆ្នាំ២០១០ ដោយបានដាក់កំហិតដល់សហរដ្ឋអាមេរិក និងរុស្ស៉ី នៅក្នុងការដាក់ពង្រាយក្បាលគ្រាប់នុយក្លេអ៊ែរយុទ្ធសាស្ត្រ មិនឱ្យលើសពី១៥៥០គ្រាប់​។ ​ក្រោមសន្ធិសញ្ញានេះ ​ទាំងសហរដ្ឋអាមេរិក និង រុស្ស៊ី ​​​អាចចុះទៅធ្វើអធិការកិច្ច នៅក្នុងឃ្លាំងអាវុធនុយក្លេអ៊ែរ​ទៅវិញទៅមក។ ប៉ុន្ដែ​ការធ្វើអធិការកិច្ចនេះក៏​​បានផ្អាក ចាប់តាំងពី​អំឡុងកូវីដ-១៩ រហូតមក​៕