តើសហរដ្ឋអាមេរិក ដាក់ពង្រាយទ័ពប៉ុន្មានកន្លែង ក្នុងប្រទេសប៉ុន្មាន​ នៅជុំវិញ​​ពិភពលោក?​

រដ្ឋធានីវ៉ាស៊ីនតោន៖ ស្របពេលមានភាពតានតឹងកាន់តែខ្លាំង នៅតំបន់មជ្ឈិមបូព៌ា និង ការប្រកួតប្រជែងខាងភូមិសាស្ដ្រនយោបាយ ជាមួយ​មហាយក្សចិន ផងនោះ សហរដ្ឋអាមេរិក បានបង្កើនការចំណាយលើវិស័យការពារជាតិដ៏ខ្ពស់បំផុត រហូតដល់ជិត​១ពាន់ពាន់លាន ឬទ្រីលលានដុល្លារ ​ហើយថា តើសហរដ្ឋអាមេរិក ដាក់ពង្រាយកងទ័ព នៅលើប្រទេសប៉ុន្មាន​ និងមានចំនួន​​ប៉ុន្មានកន្លែង នៅជុំវិញពិភពលោក?

សារព័ត៌មាន Stars Insider បានផ្សាយ ថា ​សហរដ្ឋអាមេរិក ​បានដាក់កងទ័ពឈរជើង នៅលើប្រទេសប្រហែល៨០។ បច្ចុប្បន្ន ក្រសួងការពារជាតិសហរដ្ឋអាមេរិក បានគ្រប់គ្រងកន្លែងឈរជើងរបស់ទាហានខ្លួន ជាង ៤ ៧៩០កន្លែង នៅពាសពេញពិភពលោក។​

បើតាមមជ្ឈមណ្ឌលទិន្នន័យការពារជាតិ Manpower (ម៉ែនផៅវើរ)​ បានឲ្យដឹង ថា នៅក្នុងចំណោមប្រទេសទាំងនោះ មានប្រទេសចំនួន១១ បានដើរតួនាទីយ៉ាងសំខាន់ សម្រាប់វត្ដមាន​បុគ្គលិកយោធាសកម្មដ៏ធំបំផុតរបស់សហរដ្ឋអាមេរិក នៅលើទឹកដីបរទេស រួមមាន៖

១-ប្រទេសតួកគី ដោយមានទាហានចំនួន ១ ៧00នាក់។ រីឯយន្ដហោះ​យោធាអាមេរិក ដែលកំពុងតែប្រតិបត្តិការ នៅប្រទេសតួកគី រួមមាន៖ យន្តហោះ B-1B Lancers (បេ-វ៉ាន់ប៊ី ឡែនស៊ែរ) និង យន្ដហោះ A-10 Thunderbolt II ​(អេ-១០ថាន់ដឺរបូលត៍)។​

​២-ប្រទេសប៊ែលហ្ស៊ិក ក៏ក្លាយជាមូលដ្ឋានកងទ័ពដ៏សំខាន់​របស់សហរដ្ឋអាមេរិក ហើយក៏បានដើរតួនាទីដ៏សំខាន់ នៅក្នុងការគាំទ្រដល់សកម្មភាពអង្គការណាតូផងដែរ​។​​

៣-​ប្រទេសបារ៉ែន មានវត្ដមានទាហានអាមេរិក ចំនួន ៣ ៧០០នាក់។

៤-ប្រទេសអេស្ប៉ាញ មានទាហានអាមេរិកឈរជើង ចំនួន ៤ ២៥២នាក់។​

៥-ដែនកោះពូអឺតូ រីកូ (​Puerto Rico) មានទាហានអាមេរិកឈរជើង ជាង៤ ៨០០នាក់។​

៦-កោះហ្គាម (Guam) ដែលជាដែនដីរបស់សហរដ្ឋអាមេរិក នៅមហាសមុទ្រប៉ាស៊ីហ្វិក ​មានទាហានឈរជើង ចំនួន ១១ ០១៣នាក់។​

៧-ចក្រភពអង់គ្លេស មានទាហានអាមេរិកឈរជើង ចំនួន ១១ ០០០នាក់។

៨-ប្រទេសអ៊ីតាលី ជាមូលដ្ឋានកងដឹកជញ្ជូនរបស់កងទ័ពសហរដ្ឋអាមេរិក។

៩-កូរ៉េខាងត្បូង មានទាហានសកម្មអាមេរិក ចំនួន ២៦ ៨៧៤នាក់។

១០-អាល្លឺម៉ង់ មានទាហានសកម្មអាមេរិក ចំនួន ៤៩ ៣០០នាក់។

១១-ជប៉ុន មានទាហានអាមេរិកឈរជើង ចំនួន ៦០ ៨២០នាក់នៅក្នុងចំណោមទាហានអាមេរិកនៅក្រៅប្រទេស ចំនួន ២៣០ ៥០០នាក់៕​​