បាងកក ៖ ការចាប់ផ្តើមដ៏ល្អរបស់លោក Ten Hag ខណៈ Man Utd បំបាក់ Liverpool
ទីក្រុងបាងកក ៖ ក្រុមបិសាចក្រហម Manchester United ក្រោមការដឹកនាំប្រកួតដំបូងរបស់អ្នកចាត់ទូទៅថ្មី លោក Erik ten Hag បានបំបាក់ក្រុមហ្សងក្រហម Liverpool នៅក្នុងការប្រកួតមិត្តភាពដោយលទ្ធផល ៤-០ ក្រោមក្រសែភ្នែកអ្នកគាំទ្រប្រមាណ៥ម៉ឺននាក់ នៅឯកីឡដ្ឋានជាតិ Rajamangala រាជធានីបាងកក ប្រទេសថៃ កាលពីថ្ងៃទី១២ ខែកក្កដា ឆ្នាំ២០២២។ គួររំលឹកថា ក្រុមយក្សអឺរ៉ុបចំនួន៤ មកអង្រួនអ្នកគាំទ្រនៅអាស៊ី មុនបើករដូវកាលថ្មី
កីឡាករ Jadon Sancho, Fred, Anthony Martial និង Facundo Pellistri ជាអ្នករកជ័យជម្នះសម្រាប់លោក Erik ten Hag នៅក្នុងការដឹកនាំប្រកួតដំបូង ក៏ដូចជាការចាប់ផ្តើមដ៏ល្អរបស់អ្នកចាត់ការទូទៅសញ្ជាតិហូឡង់វ័យ៥២ឆ្នាំរូបនេះ ជាមួយក្រុម Man Utd។
ក្រោយបញ្ចប់ការប្រកួតនេះ លោក Erik ten Hag បានថ្លែងថា «ខ្ញុំដឹងថាយើងមានកីឡាករល្អៗ ហើយឥឡូវនេះ យើងត្រូវបង្កើតក្រុមដ៏ល្អមួយ»។
បើទោះជាឈ្នះការប្រកួតទល់នឹង Liverpool ក៏ពិតមែន ប៉ុន្តែលោក Erik ten Hag បានលើកឡើងបន្ថែមយ៉ាងដូច្នេះថា «យើងមិនត្រូវវាយតម្លៃជាមួយលទ្ធផលនេះ ហួសហេតុពេកទេ យើងត្រូវតែប្រយ័ត្ន។ ប៉ុន្តែខ្ញុំនៅតែបានឃើញរឿងល្អៗមួយចំនួនពីការប្រកួតនេះ។ យើងមានសក្តានុពល មានគំនិតច្នៃប្រឌិតច្រើន និងបង្កើនល្បឿនឆ្ពោះទៅមុខ»។
ក្រុម Man Utd នឹងបន្តដំណើរទេសចរណ៍បាល់ទាត់របស់ខ្លួន ទៅប្រទេសអូស្ត្រាលី ដើម្បីជួបជាមួយក្រុម Melbourne Victory។ ស្របពេលដែលក្រុម Liverpool ត្រូវបន្តដំណើរទៅកាន់ប្រទេសសិង្ហបុរី ដើម្បីជួបជាមួយក្រុម Crystal Palace។ ដោយការប្រកួតទាំង២គូនេះ សុទ្ធតែធ្វើឡើងនៅថ្ងៃទី១៥ ខែកក្កដា ឆ្នាំ២០២២ ដូចគ្នា៕ (ដកស្រង់ចេញពី Bangkok Post និង Manchester Evening News)
