សម្តេចនាយករដ្ឋមន្រ្តី ហ៊ុន សែន៖ អាជ្ញាធរមិនត្រូវរើសអើងពលរដ្ឋដែលទៅចំការ លោក ខឹម វាសនា នោះទេ! ហើយពលរដ្ឋជាប្តី -ជាប្រពន្ធ និង ក្រុមគ្រួសារខ្លួនឯង ក៏មិនត្រូវរើសអើងសាច់ញាតិខ្លួនឯងដែរ!
ភ្នំពេញៈ អំឡុងពេលដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាអញ្ជើញជាអធិបតភាព ក្នុងពិធីបើកការដ្ឋានសាងសង់ជាផ្លូវការសម្រាប់ស្ពានអាកាសថ្មីចំនួន២ នៅព្រឹកថ្ងៃទី៣១ខែសីហានេះដោយស្ពានទី១ស្ថិតនៅចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្ស ជាមួយវិថីកងយោធពលខេមរភូមិន្ទ (ផ្លូវលេខ២៧១) ក្នុងទឹកដីខណ្ឌចំការមន និងខណ្ឌមានជ័យ ទី២ស្ថិតនៅចំណុចប្រសព្វមហាវិថីសហព័ន្ធរុស្ស៉ី ជាមួយមហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល (ផ្លូវលេខ២០០៤) ក្នុងខណ្ឌពោធិ៍សែនជ័យ។
សម្តេចបានឆ្លៀតលើកឡើងអំពីស្ថានការណ៍បច្ចុប្បន្នដែលបានអូសបន្លាយជាង១សប្តាហ៍នេះទាក់ទងនឹងអបិយជំនឿខ្វះការពិចារណាក្រោមការ អំពាវនាវរបស់ លោក ខឹម វាសនា ប្រធានគណបក្ស LDP ថា សម្តេចតេជោបានអំពាវនាវដល់អាជ្ញាធរដែនដីរៀបចំរថយន្តរង់ចាំទទួល និង ដឹកជញ្ជូនពលរដ្ឋចេញពីទីតាំងចំការលោកខឹម វាសនា និងរៀបចំបាយទឹកឱ្យបានសមរម្យផងដែរ។ ភាពវៃឆ្លាត និង ភាពសណ្តោសប្រោសប្រណីរបស់សម្តេចតេជោដោយត្រង់ចំពោះលោកខឹម វាសនា កុំឃាត់ពលរដ្ឋក្នុងការចាកចេញ មិនត្រូវរារាំងពលរដ្ឋដែលត្រូវចាកចេញនោះទេ។ សម្តេចតេជោ បញ្ជាក់ថាខឹម វាសនា មិនមែនជាមនុស្សរបស់សម្តេចនោះទេ តែ ខឹម វាសនា មិនដែលមានរឿងអីជាមួយសម្តេចនោះដែរ ហើយលោក(ខឹម វាសនា)ធ្វើតាមបែបផែនរបស់គាត់ចុះ ។ អាជ្ញាធរមិនត្រូវរើសអើង ពលរដ្ឋដែលទៅចំការ លោកខឹម វាសនានោះទេ ចំណែកពលរដ្ឋដែលមានប្តី ប្រពន្ធ និងក្រុមគ្រួសារ ក៍មិនត្រូវរើសអើងនោះដែរ។ សម្តេចតេជោបញ្ជាក់ថា ខឹម វាសនា បានធ្វើឱ្យពលករមួយចំនួនបាត់បង់ការងារធ្វើ និងធ្វើឱ្យពលរដ្ឋមួយចំនួនបែកបាក់គ្រួសារ តែការប្រមូលផ្ដុំនេះ បើប្រៀបធៀបនឹងបាតុកម្មនៅផ្លូវវេងស្រេងកាលពីមុនគឺខុសគ្នាដាច់៕
