ឯកឧត្តមបណ្ឌិត ជាម ច័ន្ទសោភ័ណ និងឯកឧត្តម ឆាយ វណ្ណា អញ្ជើញបិតវគ្គបាល់ទាត់ពានរង្វាន់ជើងឯក ឯកឧត្តមបណ្ឌិត ហ៊ុន ម៉ាណែត អបអរថ្ងៃជ័យជំនះ ៧ មករា រដូវកាលទី ២ ឆ្នាំ ២០២៣

( ត្បូងឃ្មុំ ) : ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តត្បូងឃ្មុំ និងឯកឧត្តម ឆាយ វណ្ណា សមាជិកព្រឹទ្ធសភា និងជាតំណាងរាស្ត្រខេត្ត អញ្ជើញបិតវគ្គបាល់ទាត់ពានរង្វាន់ជើងឯក ឯកឧត្តមបណ្ឌិត ហ៊ុន ម៉ាណែត អបអរថ្ងៃជ័យជំនះ ៧ មករា រដូវកាលទី ២ ឆ្នាំ ២០២៣ ។

ពិធីនេះធ្វើឡើងនារសៀលថ្ងៃ ១០ ខែមករា ឆ្នាំ ២០២៣ នៅទីលានបាល់ទាត់ ក្នុងឃុំជំនីក ស្រុកក្រូចឆ្មារ ខេត្តត្បូងឃ្មុំ ។
ឯកឧត្តម ឆាយ វណ្ណា និងឯកឧត្តមបណ្ឌិត ជាម ច័ន្ទសោភ័ណ បានលើកឡើងថា ការលេងកីឡា ដើម្បីសុខភាព តែបើប្រទេសជាតិមិនមានសន្តិភាព ក៏យើងទាំងអស់គ្នា មិនបានជួបជុំលេងកីឡាជាមួយគ្នាបានឡើយ ។
យើងត្រូវ អរគុណសន្តិភាព អរគុណសម្ដេចតេជោ ដែលខិតខំការពារថែរក្សាសន្តិភាព និងការអភិវឌ្ឍប្រទេស រហូតបានមកដល់សព្វថ្ងៃនេះ ពិសេសព្រឹត្តិការណ៍ប្រកួតកីឡាបាល់ទាត់ ដណ្ដើមពានរង្វាន់ ៧ មករា ឯកឧត្តម ហ៊ុន ម៉ាណែត រដូវកាលទី ២ ឆ្នាំ ២០២៣ ស្រុកក្រូចឆ្មារនេះ គឺដើម្បីអបអរ រំលឹកចងចាំ នៅថ្ងៃកំណើតទី ២ គម្រប់ ៤៤ ឆ្នាំ នៃទិវារជ័យជំនះ ៧ មករា ។
គណៈអធិបតីទាំងពីររូប បានអំពាវនាវដល់បងប្អូនប្រជាពលរដ្ឋ និងសិស្សានុសិស្សទាំងអស់ ត្រូវនាំគ្នាលេងកីឡា ឲ្យបានគ្រប់ៗគ្នា ដើម្បីទទួលបាននូវសុខភាពល្អ ទំនាក់ទំនងល្អ មានមេត្រីភាព សាមគ្គីភាព មិត្តភាព និងជៀសឲ្យឆ្ងាយពីគ្រឿងញៀន ព្រោះគ្រឿងញៀន នាំឲ្យមានគ្រោះថ្នាក់ដល់សុខភាព និងអនាគតរបស់ខ្លួន ក៏ដូចជាសង្គមជាតិទាំងមូល ។
ការប្រកួតរយៈពេល ៥ ថ្ងៃ ដែលមានក្រុមកីឡាប្រកួតចំនួន ១៦ ក្រុម លទ្ធផល ចំណាត់ថ្នាក់លេខ ១ បានទៅលើក្រុម ស.ស.យ.ក.ស្រុកតំបែរ ខេត្តត្បូងឃ្មុំទទួលបានពានរង្វាន់ ១ មេដៃមាសចំនួន ២៣ គ្រឿង និងប្រាក់រង្វាន់ចំនួន ៨ លានរៀល ចំណាត់ថ្នាក់លេខ ២ បានទៅលើក្រុម គោព្រៃជយោ ក្នុងខេត្តកំពង់ចាម ទទួលបានមេដៃប្រាក់ចំនួន ២៣ គ្រឿង និងប្រាក់រង្វាន់ចំនួន ៦ លានរៀល លេខ ៣ បានទៅលើក្រុម មហាហង្សឈើទាលភ្លោះ ខេត្តក្រចេះ ទទួលប្រាក់រង្វាន់ចំនួន ៤ លានរៀល និងលេខ ៤ ក្រុមអធិរាជតេជោសែនជំនីក ក្នុងឃុំជំនីក ស្រុកក្រូចឆ្មារ ខេត្តត្បូងឃ្មុំ ទទួលបានប្រាក់រង្វាន់ចំនួន ២ លានរៀលផងដែរ ៕