ឯកឧត្តម អ៊ុន ចាន់ដា រដ្ឋបាលស្រុក ឲ្យម្ចាស់ការរៀបចំសង្ក្រាន្ត នៅក្នុងមូលដ្ឋានរបស់ខ្លួន ដើម្បី បង្កភាពសប្បាយរីយរាយប្រជាពលរដ្ឋ

កំពង់ចាម ឯកឧត្តម អ៊ុន ចាន់ដា អភិបាលខេត្ត នៃគណៈអភិបាល ខេត្តកំពង់ចាម បានណែនាំដល់រដ្ឋបាលស្រុក ម្ចាស់ការរៀបចំសង្ក្រាន្ត នៅក្នុងមូលដ្ឋានរបស់ខ្លួន ដើម្បី បង្កភាពសប្បាយរីយរាយជូនប្រជាពលរដ្ឋ ខណៈពេលដែលរដ្ឋបាលខេត្ត សហការជាមួយ រដ្ឋបាលក្រុងកំពង់ចាម និងមន្ទីរ អង្គភាព រៀបចំសង្ក្រាន្តធំជាងគេ នៅទីលានវាលស្មៅខាងមុខសាលាខេត្ត ស្ថិតនៅក្នុងក្រុងកំពង់ចាម ។ ឯកឧត្តម អ៊ុន ចាន់ដា ណែនាំបែបនេះ នាឱកាស អញ្ជើញជាមួយ ឯកឧត្តម ខ្លូត ផន ប្រធានក្រុមប្រឹក្សាខេត្ត នាឱកាសដឹកនាំកិច្ចប្រជុំ ស្ដីពីការត្រៀមលក្ខណៈរៀបចំសង្រ្កាន្ត អបអរសាទរពិធីបុណ្យចូលឆ្នាំខ្មែរប្រពៃណីជាតិ ឆ្នាំថោះ ដែលបានរៀបចំ នៅសាលប្រជុំសាលាខេត្ត នារសៀលថ្ងៃទី២៧ ខែមីនា ឆ្នាំ២០២៣ នេះ ។ កិច្ចប្រជុំនេះ ក៏មានការអញ្ជើញចូលរួម ពីលោក លោកស្រី ជាអភិបាលរងខេត្ត លោក លោកស្រី ជាប្រធាន អនុប្រធានមន្ទីរ អង្គភាព កងកម្លាំងទាំងបី និងមន្ត្រីពាក់ព័ន្ធ ជាច្រើននាក់ ផងដែរ ។
ឯកឧត្ដម អភិបាលខេត្ត បានគូសបញ្ជាក់ថា នាឱកាសអបអរសាទរ ពិធីបុណ្យចូលឆ្នាំខ្មែរប្រពៃណីជាតិ ឆ្នាំខាល ចត្វាស័ក ព.ស ២៥៦៦ ខាងមុខ នឹងឈានចូលមកដល់ នាពេលខាងមុខឆាប់នេះ រដ្ឋបាលខេត្តគ្រោងនឹងរៀបចំព្រឹត្តិការណ៍សប្បាយរីករាយ ដល់ប្រជាពលរដ្ឋ មកលេងកំសាន្ត ដោយមានការរៀបចំនូវល្បែងប្រជាប្រិយប្រពៃណីខ្មែរ មានដូចជា ៖ របាំត្រុដិ វាយក្អម ទាញព្រ័ត្រ ចោលឈូង បោះអង្គុញ និងការប្រគុំតន្រ្តីសម័យ ជាដើម ហើយមានរយៈពេល ៣ថ្ងៃ គឺ ៖ ថ្ងៃទី១៤ ១៥ និងថ្ងៃទី១៦ ខែមេសា ឆ្នាំ២០២៣ ។ ជាមួយនោះ ក៏គ្រោងនឹងរៀបចំពិធីស្រង់ព្រះ នាថ្ងៃទី១៦ ផងដែរ ។
ឯកឧត្តម អ៊ុន ចាន់ដា បានស្នើទៅដល់ លោក អភិបាលស្រុក ត្រូវម្ចាស់ការដោយខ្លួនឯង ជាពិសេស សហការជាមួយវត្តអារាម រៀបចំព្រឹត្តិការណ៍ផ្សេងៗ និងការរៀបចំពិពណ៌សមិទ្ធផល នៅក្នុងឃុំ នៅទូទាំងស្រុករបស់ខ្លួន មកដាក់តាំងបង្ហាញ ដើម្បី បង្កលក្ខណៈសប្បាយរីករាយ ដល់ប្រជាពលរដ្ឋ ក៏ដូចជា ភ្ញៀវទេសចរណ៍ មកលេងកំសាន្ត ឲ្យបានអធិកអធមបំផុត ។ ទន្ទឹមជាមួយនោះ ឯកឧត្ដមអភិបាលខេត្ត ក៏ស្នើទៅដល់រដ្ឋបាលក្រុង ស្រុក មន្ទីរ អង្គភាព គ្រឹះស្ថាន វិស័យឯកជន តុបតែងភ្លើងលម្អ និងរៀបចំពាក្យស្លោកនានា នៅកន្លែងរបស់ខ្លួន ដើម្បី ទទួលអំណរសាទរទេវតាឆ្នាំថ្មី ។ ក្រៅពីនោះ អាជ្ញាធរ មានសមត្ថកិច្ច ក៏ត្រូវលើកផែនការសន្តិសុខសណ្ដាប់ធ្នាប់សាធារណៈ ដើម្បី ថែរក្សាសុខ សុវត្ថិភាព ជូនប្រជាពលរដ្ឋយើង មកលេងកំសាន្ត ផងដែរ ៕