មេដឹកនាំអាស៊ាន បាននិងកំពុងស្តារសេដ្ឋកិច្ចគ្រប់ជ្រុងជ្រោយឡើងវិញ!

ឯកឧត្តម ទិន ពន្លក រដ្ឋលេខាធិការ តំណាងឯកឧត្តម សាយ សំអាល់ រដ្ឋមន្រ្តីក្រសួងបរិស្ថានកម្ពុជា នៅក្នុងពេលអញ្ជើញជាអធិបតី បើកជាផ្លូវការកិច្ចប្រជុំ ឧត្តមមន្រ្តីបរិស្ថានអាស៊ាន លើកទី៣៣ និងកិច្ចប្រជុំពាក់ព័ន្ធ ដែលមានការអញ្ជើញចូលរួមពីថ្នាក់ដឹកនាំ នៃក្រសួងស្ថាប័ន បណ្តាប្រទេសអាស៊ានទាំង១០ រួមជាមួយតំណាងលេខាធិការអាស៊ាន និងភ្ញៀវកិត្តិយសជាតិ អន្តរជាតិជាច្រើនទៀត កាលពីថ្ងៃពុធ ទី០៥    ខែតុលា ឆ្នាំ២០២២ ម្សិលមិញនេះ ក្នុងខេត្តសៀមរាបបានឲ្យដឹងថាៈ មេដឹកនាំអាស៊ាន បាននិងកំពុងស្តារសេដ្ឋកិច្ចគ្រប់ជ្រុងជ្រោយឡើងវិញ  ដែលផ្តោតសំខាន់ លើការផលិតនិងការប្រើប្រាស់ដោយចីរភាព រួមជាមួយសេដ្ឋកិច្ចវិលជុំ។ ទន្ទឹមនឹងនេះ រដ្ឋាភិបាលនៃបណ្តាប្រទេសសមាជិកអាស៊ាន បាននិងកំពុងយកចិត្តទុកដាក់លើ ការងារបរិស្ថាន ការអភិវឌ្ឍសេដ្ឋកិច្ចបៃតងទីក្រុងឆ្លាតវៃ ហេដ្ឋារចនាសម្ព័ន្ធប្រកបដោយនិរន្តរភាព។ជាមួយគ្នានេះ ឯកឧត្តម ទិន ពន្លក បានបញ្ជាក់ថា៖ អាស៊ាន បាននិងកំពុងរៀបចំយុទ្ធសាស្រ្ត អភិវឌ្ឍន៍សេដ្ឋកិច្ចសង្គម ក្រោយការរាលដាលជំងឺកូវីដ-១៩ ឲ្យមានភាពធន់នឹងកត្តាគម្រាមកំហែងពីខាងក្រៅ ជាអាទិ៍ជំងឺរាតត្បាត ការប្រែប្រួលអាកាសធាតុ និងបញ្ហាភូមិសាស្ត្រនយោបាយ ក្នុងនោះវិស័យបរិស្ថាន និងការគ្រប់គ្រងធនធានធម្មជាតិ ដើរតួនាទីសំខាន់ក្នុងការអភិវឌ្ឍសេដ្ឋកិច្ចតំបន់។  សូមបញ្ជាក់ផងថា ក្នុងនាមប្រធានអាស៊ាន ដែលបានកំណត់យុទ្ធសាស្រ្ត ក្រោមមូលបទ « អាស៊ានដោះស្រាយបញ្ហាប្រឈមជាមួយគ្នា» គឺប្រទេសកម្ពុជា កំពុងពង្រឹងកិច្ចសហប្រតិបត្តិការក្នុងតំបន់ ជាមួយភាគីពាក់ព័ន្ធទាំងអស់ ដើម្បីដោះស្រាយបញ្ហាបរិស្ថាននៅក្នុងតំបន់ និងសកលលោក។យុទ្ធសាស្រ្តចំនួន៧ ត្រូវបានដាក់ចេញសម្រាប់ការងារបរិស្ថានគឺ មានការអប់រំបរិស្ថាន ការគ្រប់គ្រងបរិស្ថានតំបន់ឆ្នេរ ទីក្រុងនិរន្តរភាព ការគ្រប់គ្រងសារធាតុគីមីនិងសំណល់ ប្រភពទឹក ការប្រែប្រួលអាកាសធាតុ និងការអភិរក្សធនធានធម្មជាតិនិងជីវៈចម្រុះ។ សមិទ្ធផលរបស់កម្ពុជា សម្រេចបាននាពេលកន្លងមក     កម្ពុជាបានចូលរួមអនុវត្តនូវកិច្ចព្រមព្រៀងពហុភាគីស្តីពីបរិស្ថានជាច្រើន ជាពិសេសបានពង្រឹងការប្តេជ្ញាចិត្ត ធ្វើសកម្មភាពប្រឆាំងនឹងការប្រែប្រួលអាកាសធាតុ តាមរយៈការដាក់ជូននូវរបាយការណ៍ជាតិស្តីពីការរួមចំណែកអនុវត្ត អនុសញ្ញាប្រែប្រួលអាកាសធាតុ (NDC) យុទ្ធសាស្រ្តរយៈពេលវែងស្តីពីអព្យាក្រឹត្យកាបូន និងធ្វើសកម្មភាព និងវិធានការសមស្រប ដើម្បីគ្រប់គ្រងប្លាស្ទិក និងសំណល់ កិច្ចសហប្រិបត្តិការក្នុងស្រុកនិងអន្តរជាតិ និងការកៀរគរធនធានដើម្បីគ្រប់គ្រងធនធានធម្មជាតិ រួមទាំងតាមរយៈហិរញ្ញប្បទានការបូន៕