អាគារប៉ុស្តិ៍នគរបាលរដ្ឋបាលចំនួន ២ កន្លែង ត្រូវបានចាប់ផ្ដេីមសាងសង់ថ្មី ក្នុងរយៈពេលត្រឹមតែបីសប្ដាហ៍ នៃការចូលមកកាន់ក្នុងមុខតំណែងជាស្នងការ របស់ លោកឧត្តមសេនីយ៍ត្រី ហេង វុទ្ធី
( កំពង់ចាម ) : លោកឧត្ដមសេនីយ៍ត្រី ហេង វុទ្ធី ស្នងការនគរបាលខេត្តកំពង់ចាម និងលោក ខេង ម៉េងឈុន អភិបាល នៃគណៈអភិបាលស្រុកព្រៃឈរ បានដឹកនាំកងកម្លាំងចូលរួមក្នុងពិធីបញ្ចុះបឋមសិលា សាងសង់អាគារប៉ុស្តិ៍នគរបាលរដ្ឋបាលសូរសែន្យ នៃអធិការដ្ឋាននគរបាលស្រុកព្រៃឈរ ដែលមានទំហំ ទទឹង ១១ ម៉ែត្រ និងជម្រៅ ៩ ម៉ែត្រ ដែលគ្រោងចំណាយថវិកាអស់ប្រមាណជិត 20.000$ (ពីរម៉ឺនដុលា្លរអាមេរិក) ដោយទទួលបានការឧបត្ថម្ភពី ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម ។
ពិធីនេះធ្វើឡើងនាព្រឹកថ្ងៃទី ២៤ ខែមករា ឆ្នាំ ២០២៣ ស្ថិតនៅក្នុងសូសែន ស្រុកព្រៃឈរ ខេត្តកំពង់ចាម ។
លោកឧត្តមសេនីយ៍ស្នងការក៏បាននាំអំណោយដ៏ថ្លៃថ្លារបស់ ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ ឧបត្ថម្ភដល់លោកនាយប៉ុស្តិ៍នគរបាលរដ្ឋបាលសូរសែន្យ សម្រាប់ចាក់ដីបំពេញបន្ថែមក្នុងបវិវេណប៉ុស្តិ៍ នូវថវិកាចំនួន 1.000$ ជូនបច្ច័យតាជី យាយជីចំនួន ៣០ នាក់ ក្នុងម្នាក់ៗ បច្ច័យ ១ មុឺនរៀល សារុង ១ ផងដែរ ។
ក្នុងនោះផងដែរលោកឧត្តមសេនីយ៍ស្នងការ និងសហការី បានបន្ដចុះត្រួតពិនិត្យប៉ុស្តិ៍នគរបាលរដ្ឋបាលបារាយណ៍ នៃអធិការដ្ឋាននគរបាលស្រុកព្រៃឈរ ដេីម្បីត្រៀមលក្ខណៈចលនាសាងសង់អាគារថ្មីជាបន្តទៀត ។
សូមបញ្ជាក់ផងដែរថា លោកឧត្តមសេនីយ៍ត្រី ហេង វុទ្ធី ស្នងការនគរបាលខេត្តកំពង់ចាម បានចូលឥមកកាន់ក្នុងមុខតំណែងជាស្នងការ នៃស្នងការដ្ឋាននគរបាលខេត្តកំពង់ចាម តាមប្រកាសរបស់ក្រសួងមហាផ្ទៃ កាលពីដេីមខែមករា នាពេលថ្មីៗកន្លងមកនេះ ។ ហើយបេីគិតមកដល់ពេលបច្ចុប្បន្ននេះ រយៈពេលត្រឹមតែ បីសប្ដាហ៍ គឺមិនដល់មួយខែផង អាគារប៉ុស្តិ៍នគរបាលរដ្ឋបាលចំនួន ២ កន្លែងបាននឹងកំពុងចាប់ផ្ដើមសាងសង់ថ្មី ក្នុងនោះមានប៉ុស្តិ៍នគរបាលរដ្ឋបាលទួលព្រះឃ្លាំង នៃស្រុកស្ទឹងត្រង់ និងពេលនេះប៉ុស្តិ៍នគរបាលរដ្ឋបាលសូរសែន្យ នៃអស្រុកព្រៃឈរ ខេត្តកំពង់ចាម ដែលកំពង់តែចាប់ផ្ដើមផងដែរ ។
លោកឧត្តមសេនីយ៍ ហេង វុទ្ធី ស្នងការនគរបាលខេត្តកំពង់ចាម បានមានប្រសាសន៍ថា ការកសាងអគាររប៉ុស្តិ៍នគរបាលរដ្ឋបាលទាំងនេះឡើង ដើម្បីជួយសម្រួលដល់ការបំពេញការងាររបស់កងកម្លាំងនគរបាលឱ្យកាន់តែមានភាពងាយស្រួល ក្នុងការបម្រើសេវាសាធារណៈជូនប្រជាពលរដ្ឋ ។
លោកឧត្តមសេនីយ៍ស្នងការ ក៏បានណែនាំដល់ លោកមេប៉ុស្តិ៍ កងកម្លាំងនគរបាលប៉ុស្តិ៍រដ្ឋបាលទាំងអស់ ត្រូវសាមគ្គីភាពផ្ទៃក្នុងឱ្យបានល្អ និងត្រូវខិតខំអនុវត្តតួនាទី ភារកិច្ច របស់ខ្លួនឱ្យល្អប្រសើរ ក្នុងការរក្សាសន្តិសុខ សុវត្ថិភាព ជូនប្រជាពលរដ្ឋ ជាពិសេស ក្នុងកិច្ចប្រតិបត្តិការ បង្ក្រាបបទល្មើសផ្សេងៗ បានទាន់ពេលវេលា ដោយផ្ដល់នូវភាពកក់ក្ដៅ និងបង្កើននូវជំនឿទុកចិត្តពីសំណាក់ប្រជាពលរដ្ឋ មកលើកម្លាំងសមត្ថកិច្ចរបស់យើង ៕ សុខ ផន
