បន្ទាប់ពីវះកាត់ជំងឺបេះដូងដោយជោគជ័យ កុមារាកម្ពុជារូបនេះបានមកជួបលោកប្រធានាធិបតីកូរ៉េខាងត្បូងផ្ទាល់ដល់ការិយាល័យ តាមការអញ្ជើងពីភរិយារបស់លោក…

ភរិយារបស់លោកប្រធានាធិបតីកូរ៉េ Yoon Seok-yeol បានអញ្ជើញក្មេងប្រុសកម្ពុជា ឈ្មោះ រដ្ឋា មកការិយាល័យ ប្រធានាធិបតី បន្ទាប់ពីការវះកាត់ជំងឺបេះដូងដោយជោគជ័យ។

លោកប្រធានាធិបតីបាននិយាយថា អរគុណអ្នកគ្រប់គ្នាដែលបានជួយ រដ្ឋា ទទួលការព្យាបាល ហើយត្រលប់មកកម្ពុជាវិញ ដោយមើលទៅរូបរាងដ៏រឹងមាំរបស់ រដ្ឋា បន្ទាប់ពីការវះកាត់ជំងឺបេះដូងដោយជោគជ័យ។

អ្នកស្រី គីម គុនហេ បាននិយាយថា អ្នកស្រីមានការព្រួយបារម្ភ ប្រសិនបើ រដ្ឋា ដែលមានជំងឺបេះដូង ហើយអាចធ្វើដំណើរទៅកាន់ប្រទេសកូរ៉េ ដោយសុវត្ថិភាពពីប្រទេសកម្ពុជា ហើយសូមអរគុណក្រុមហ៊ុនអាកាសចរណ៍កូរ៉េ ដែលបាននាំ រដ្ឋា មកប្រទេសកូរ៉េប្រកបដោយសុវត្ថិភាព។ ជាពិសេស ខ្ញុំសូមថ្លែងអំណរគុណ និងគោរពជូនចំពោះបុគ្គលិកពេទ្យនៃមន្ទីរពេទ្យ Seoul Asan ដែលបានវះកាត់ជំងឺបេះដូងដ៏លំបាក របស់ រដ្ឋា ដោយជោគជ័យ ។

បន្ថែមពីលើនេះ លោកស្រី Kim Kun-hee បាននិយាយថា អ្វីគ្រប់យ៉ាងដែលបានកើតឡើងចាប់តាំង ពីអ្នកស្រីបានជួប រដ្ឋា នៅកម្ពុជាក្នុងខែវិច្ឆិកា មានអារម្មណ៍ដូចជាអព្ភូតហេតុពីមនុស្សជាច្រើន។

រដ្ឋា បានសរសេរលិខិតថ្លែងអំណរគុណនៅលើកាតប៉ុស្តាល់ដែលតុបតែងដោយផ្កាហើយប្រគល់វាជាអំណោយដល់ លោក ប្រធានាធិបតី និងភរិយា។

លោកស្រី Kim Kun-hee បានជួបក្មេងប្រុសកម្ពុជា ដែលមានជំងឺបេះដូង ក្នុងឱកាសដែល អ្នកស្រីបានអម ដំណើរស្វាមី ជាប្រធានាធិបតីសាធារណរដ្ឋកូរ៉េ ចូលរួមកិច្ចប្រជុំកំពូលអាស៊ានដែលកម្ពុជាធ្វើជាម្ចាស់ផ្ទះ ក្នុងខែវិច្ឆិកា ឆ្នាំ ២០២២កន្លងមក។ ប្រភពៈ ក្រសួងព័ត៌មាន